обновлено: 04:00, 02 июня 2023
Лух Авт
Веӆпасӆаты ёх Ас пеӆа касаӆӆат
Щаня ёханан еңк манам юпийн, ай куртатан уӆты мохет ищи ӆэщатыты питсат. Кашң ӆуң хуӆ веӆты ёх Ас пеӆа касаӆӆат.
Хопӆаӆ ӆэщатмеӆ юпийн, мосты сохӆаӆ, пормасӆаӆ, моторӆаӆ, хоӆапӆаӆ, бензин пущкайӆаӆ нык аӆӆаӆӆаӆ. Актащты порайн ӆыващ тэӆые. Катра порайн караң тэӆ хопат июпийн ныкӆы пеӆа манӆат. Ин хоты щи арат антом. Асан хуӆаӆ шимӆа йис, хуӆ веӆпасӆаты планаӆ ищи эватман тайӆа.
Ныкӆы пеӆа касаӆман хуӆ веӆты ёх Щаня ёхан ӆоратан па хоӆпат опсыӆыӆат, питы хуӆ квота тэкаптаман. Ванта, Асан йиңкаӆ хоӆна ун па мув сыӆӆаӆ йиңкан ӆойӆат.
Ущ тыӆащ хутхощъяңмет хатӆ эӆты хуӆ веӆпасӆаты ант эсаӆты нэпекаӆ сохнаӆ. Щи ӆоват ӆаварт рупатайн рупитман веӆпасӆаты ёх ищипа еша хурыман уӆаты. Хуӆ веӆпасӆаты нэпекӆан патан шавиман таяӆан, хоп па мотор нэпекат ищи ӆэщатман ат уӆӆат. Нэмоӆты верӆы штраф сохаптаты охан ант ат хойӆайты.
Зоя Куртямова ханшам потар
