Лух Авт
Вер щиран иса утаӆтыты мосаӆ
Кашӊ таӆ шоши мир хоятӆува нётапса пормасат маӆайт. Хуӆ-вой веӆпасӆаты ёх, вуӆы хотан рупитты хоятата ёша маты еӆпийн, щи пормасат ӆутты мосӆат. Анта аӆ ӆапкая яӊхты па щита ӆутты, нэпек хуват туӊа-щира ӆэщатты. Щи кеша 44 Федеральной Закон (ӆутасты вер) уятты мосаӆ.
Ун кер тыӆащан газетаев верты хота Иван Эдуардович Сандрин ӆоӊтыйс. Ӆув Пулӊават воша утаӆтыты ёхтыӆыйс па щит эӆты айкеӆ верас: «Муӊ рупатаев хуват пормас маты нётопса вер артаӆаты ураӊан утаӆтыты китсаюв. Ӆорвош район эӆты ӆапат хоят ёхтыӆыйс. Округев па вошат эӆты ищи хоятат усат.
Тамащ вер пеӆа ма оӆаӊ пуш утаӆтыӆам. Кущаем отпуска, муй па командировкая мантаӆ порайн, там рупата ищи па верты мосаӆ. Щит ураӊан утаӆтыты китсайм. Там рупата мосты кут ант верӆа ки, мохты штраф понӆа. Нэпек ёвра ӆэщатӆа па штраф ёхатаӆ. Щит ураӊан ӆэщатты вер иса яма уятты мосаӆ. Ин ёхи ёхаттэм юпийн, еӆӆы па утаӆтыты мосаӆ, тестирование верты. Щаӆта веӆщи нэпекан маӆаюв.
Тый ёхатмем еӆпийн, ёӆан дистанционно онлайн курсат хуӆантсув. Вошан, муӊев очно утаӆтаты ураӊан, щимащ верат туты нэ кат хатӆ потартас, хоты мосаӆ контрактат, нэпекат туӊа-щира ӆэщатты, коммерческой запросат вертыя. Щи щиран муӊ торги верӆув, мосты пормасат, нуйт, парщинат, медицинской аптечкайт, муй мосаӆ, пормас тыныты хоятат кутан пирыӆув. Хой поставщик щи щирн нох этаӆ, щи хоятэв муӊев Мужи воша пормас ёхтаптаӆ. Пормас муӊ хощаев ёхатты юпийн, муӊ тащ хотан, хуӆ веӆпасӆаты ёхӆува, хой заявление нэпек ханшас, очередь хуват пормас митаӆаӆув.
Ӆорвош районан хуӆ-вой веӆпасӆаты, тащ хотан яӊхты хоятӆам пеӆа ястаты утщиӆам. Мужия вер щиран ёхтыӆытан порайн, муӊ хощаев па ӆоӊтыяты. Аӆ уща верты, моӆты инщасты муй рахаӆ вохты, муй ант рахаӆ. Муй нётопса вер ураӊан, муй хорпи заявление нэпек ханшты мосаӆ. Верытты кемеван иса нётӆаӆӆув. Муӊ тата нын урӊанан рупитӆув. Нын уӆапсаяна нётапса вер туӆув».
Муӊ па ут хотатан рупитты хоятӆува ясаӊ китӆув. Рупатаян кен ат уӆ. Ханты хоятӆув пеӆа самаӊа уӆаты, мосты щира иса потартаты.
Зоя Куртямова ханшам потар
Авторы
Лух Авт
Темы