Лух Авт
Верантты хатнэху пиӆн уйтантысам
Хащам таӆан Мужи вошн Ӆорвош районан тынасты-ӆутасты харн рупатаем щирн усам. Щита ма Емельян Кириллович Куртямов пиӆан уйтантысам. Ӆув Щаня ёхан мув эӆты. Овкуртан уӆ. Там йисан монщаӊ, араӊ па верантты хоят щах шимаӆ. Щишан ӆув пиӆэӆн еша потрэмасман.
– Емельян Кириллович, наӊ уӆты-хоӆты щирӆан эӆты муӊева айкеӆ туӆан?
– Ма Щаня ёхан мувем эӆты уӆты хоят. Там нови турам иӆпия ма ар няврэмаӊ хоттэӆ ёх тайты хотн, ай кер тыӆащ 11-мет хатаӆн 1958-мет таӆн ёхатсам. Хота па маты тахайн сэма питсам, ин нэмоӆты ястатыя ант па верытӆам. Аӆ па, унт хоща. Катра иса нюрм мувн муй унтатн па ёханэвн хуӆ па вой веӆпасӆаты пораятн сэма питтыя верытсув. Япсыена уйтӆэм, хоты муӊ иса Вутвош куртэвн Щаня ёхан мувевн хоӆыена усув па ай тэӆн щита энампсув. Муӊ аӊкев-ащев хоща аратэӆн яртъяӊ няврэм ус: хуӆам пох па хут эвие. Ӆый кутэӆн ма мет ун яй усам.
Ащем уӆты-хоӆты хуватаӆн хуӆ муй па вой веӆпасӆаты хоята ус. Щи ураӊан, хун хуӆ веӆпасӆ сохноптаӆӆы, унт вой веӆпаса Нёхас ёханэв пеӆа нохӆы манты ӆэщатыйӆ. Ванта, щи унтэв пелакн катра пораятн ӆаӊки, нёхас па арсыр вой иса тэӆые ликмиӆыйс. Муӊ веӆпасӆаты ёхӆув щи тахайт эӆты таӆтэӆн ёхӆы пеӆа ант ёхтыӆысат па ямкем арат тынаӊ унт вой сохат планат щирн кашӊ товийн государстваева щи мийӆыӆысат.
– Муйсыр куртаӊ ашкула-интернат хотн наӊ ай тэӆн утаӆтысан па энампсан?
– Ма Овкуртаӊ нийӆмет классаӊ ашкуӆа-интернат хотн утаӆтысам па усам. Щиӊанща щи ашкуӆаемн нийӆмет класс 1974-мет таӆн етшаптасам па ущ ёхатты тыӆащ оӆаӊ хатӆ вуш эӆты Мужи вошн верам совхоз тахайн хуӆ па вой веӆпасӆаты хатнэху щирн рупитты мантсам. Ма ванта, апщиӆам кутан мет ун усам па аӊкема-ащема айшак няврэмӆаӆ энмаӆтыя ищи нёттыя мосас.
Щи пораятн государстваев эӆты хуӆ веӆты щирн арсыр планатн мийӆысаюв. Иӆэм таӆ сыс кашӊ хатнэху 12 тонна арат арсыр хуӆат мощаттыя верытас. Мин ащем пиӆн ияха, хуӆам тыӆащ сыс, ӆуӊ порайн, атаӊ-хатӆ веӆпасӆыман тыеӆ-тохеӆ яӊхсаман. Ӆоран аӆ хоӆпат вантӆаман, катӆам хуӆат юх эӆты верам ӆашкупа маӆӆув, щи юпийн, етна пелка ноптаӆты паната манӆув, щита атаӆн ищиты веӆпасӆаӆув.
Кат муй хуӆам щёскем арат туп щутщаӆув па еӆӆы веӆпасаӊ верӆува яӆпа катӆасӆув. Щаӆта туп суса питам порайӆувн совхоз кущайт ястасат муӊева, хоты мин ащем пиӆн щи хуӆам ӆуӊ тыӆащ сыс аратэӆн 24 тонна арат хуӆ государстваева масув па планэв тэкнаптасэв. Ванта, шеӊк самаӊа па вещката ащем пиӆн китомтак рупитсамн. Щаӆта па щи йисатн муӊ Асэвн муй ёханӆувн ям ар хуӆ ус. Юхат мет оӆаӊ ӆонщ там мувева питмаӆ вер юпийн ма ищиты ащем пиӆн Нёхас ёханэв хуват яӊхсам па арсыр унт войт веӆпасӆасам.
– Емельян Кириллович, хун па наӊ Мужи вош совхоз вуӆы тащатн рупитты питсан, аӆ па, щи тахайн вуӆэт ӆаваӆты хатнэху щирн усан?
– Щиӊанща 1974-мет таӆн хуӆ па вой веӆпасӆаты хатнэху щирн совхоз хоща туп иӆэм таӆ сыс усам. Щаӆта па ищи тахаемн 1975-мет таӆ вуш эӆты ма иса вуӆы тащат ӆаваӆты хоят щирн рупитты питсам. «Мужевской» нэмпи совхоз вуӆы тащатн аратэӆн 30 таӆ сыс арат рупитсам, унашак ювмем юпийн щутщаты мантсам. Ин щикуш пенсияйн уӆӆам па ищи па ма юканэма тайты вуӆылэӊкиӆам пиӆн ёӆн волкемаӆам. Там йисатн, ванта-са, «Буран» тутаӊ ухӆат па сыр-сыр машинайт, па хон пелак хоп сэвас моторат хоӆыена тайӆув. Щи отат онтасатн вуӆэт ухӆа нох ант па кирӆув. Ма щирэмн, ӆый иса ухӆатн тыеӆ-тохеӆ яӊхты щират хоӆыена ёрэмаӆат.
– Нынана тамащ тынасты-ӆутасты харат еӆӆы пеӆа мосӆат муй анта, муйсыр онтасат ӆый аӆ ханты хоятӆува тутыя верытӆат?
– Ма нумастэмн, тамащ тынасты-ӆутасты харат муӊева мосӆат. Там пуш ма тый ай соӆпи сарах хуӆат, сыр-сыр вонщам отат тусам. Щи тумпийн, ванта, верантты хоята уӆӆам па ма ёшӊаӆамн туӊа-щира, туса ӆэщатам пормасыет патан вусам, щит: хуванат, ӆыят, нялэт, хоп ӆупӊан, ӆохат, арсыр антпат. Ма ин пенсияйн уӆӆам. Тыӆащ сыс вуты охӆам шеӊк шимӆат. Щимащ вер ураӊан моӆты пормас тата еӆ ки тыныӆам, щит манэма — ям па ӆувеӆ, ӆутты хоятата, ищи ям питӆ. Щаӆта тата муӊ рут ёхӆув-нэӊӆув пиӆн иса ияха уйтантыӆув па муӊ кутэвн арсыр верат эӆты потартыӆув. Ям тынасты харат тата версайт.
Владимир Енов ханшам потар
Авторы
Лух Авт
Темы