Лух Авт
Вещкат нэ ёшатн уӆапса еӆӆы туӆа
Кашӊ таӆ кашӊ мувн нэӊат емаӊ хатӆ постаӆа па нэӊат эӆты ханшӆа, потарӆа па арыӆа. Вуӆы тащ хотатн рупитты нэӊат — щит юраӊ нэӊат. Ун вошатн па па муватн щимащ рупата эӆты воӆӆы ант уйтӆа. Туп тата, хоӆна муӊ мувӆувн вуӆы тащат шавиӆаят, нэӊат ищи ар нётап верӆат. Нэ ки тащ хотатн антом — матты ки нушая питӆа. Нэ ӆонщам хот хошма ӆэщатӆаӆы, сыстампӆаӆы па эпӆаӊ ӆэтот кавартаӆ. Иса муй мосаӆ иса вераӆ. Ӆув юх эватаӆ па халытаӆ, ёхи ӆоӊаӆтаӆ па кур аӆаӆ. Щит иса ӆув рупатайӆ.
Иӆ омасты кум антом. Сох татаӆты мосаӆ, вай па сох ӆукарматы омпсыӆыты па мосаӆ. Щикут няврэмӆаӆ вощхемиты па ӆапатты. Етна пелка ёх тащ эӆты ёхи йиӆат — ӆув кешаеӆ ӆэты пасан омасты па щи юпина шакъйиӊка ювам сох сораӆты па пусты. Вуӆы хотатн сох пусты па ан лёхитты машина антом. Сишн щи вер иса ёшн верӆа. Муй арат йиӊк мосаӆ — иса нэ ёшатн аӆӆаят. Касаӆты пораян хот лосытты па ӆонщты вер иса нэ ёша питаӆ. Щи арат юраӊ нэӊат вуӆы тащ хотатн рупитӆат!
Валентина Алексеевна Кондыгина 15-мет хатаӆн ай тахаят потты тыӆащ 1947-мет таӆн Катравошна сэма питас. Опращӆаӆ уӆтэӆ хуват вуӆы тащ хотатн рупитсат. Щиты Валентина ашкуӆайн нийӆ класс утаӆтыты етшам юпина мохты ёхи хащас. Аӊкеӆа па ащеӆа касаӆты нётап верас. Опращӆаӆн шеӊк яма утаӆтаса хоты мосаӆ туӊа-щира рупитты па мосты вер верты. Щаӆта 1979-мет таӆн ӆув рупатая Горковской оленеводческой совхоз хоща ханшӆтаӆа. Щита ӆув 2001-мет таӆ унты рупитас па уйт ӆор тыӆащн пенсияя щутщаты этас. Намн еша ус па щутщас. Аӆ омасты каш. Щаӆта товиян 2010-мет таӆн па рупатая этас. Ищи тахая рупатая вуса. Туп рупитам совхозӆ яӆап нэмн понм — сельскохозяйственное предприятие «Горковское». Инты унты ӆув хоӆна рупитаӆ. Энамты ёх эӆты ёхи ант хащаӆ.
Рупитты тащаӆн Валентина Алексеевна самаӊа тайӆа па ишакӆа. Ӆув вещката рупитаӆ, верӆаӆ иса туӊа-щира ӆэщатӆаӆы. Нэ рупатайӆ тумпина ёх хоятата нётаӆ тащ ӆойӆтыты па мушмаӆтам каӆаӊат нох паватаӆ. Хота мосаӆ энамты хоятата нётаӆ па ястаӆ, хоты там па тум вер верты. Ӆув ийикеӆ пиӆан хут няврэм энмаӆсаӊан. Похӊаӆаӆ ищи вуӆэт пиӆан уӆапсаеӆ туӆэӆ. Ун похаӆ, Виктор, уӆтаӆ хуват вуӆы леккара рупитас, ин па пенсияя питас па ищипа вуӆы хота нётты ёхтыӆыяӆ. Айшак похаӆ, Иван, ӆув пиӆэӆан касаӆаӆ, пастуха рупитаӆ.
Энамты ёх, Валентина Кондыгина пеӆа, хуӆантыӆат па иса муй мосаӆ инщасыӆат. Яма рупитмаӆ ураӊан ӆув ар пуш арсыр мойӆапсаятн мойӆыӆыса. Щит Благодарность Ӆорвош район куща эӆты 2011-мет таӆн. Почётная грамота Ӆорвош район куща эӆты 2015-мет таӆн па Благодарность Ӆорвош район Дума эӆты 2019-мет таӆн. Вет таӆ хащамн Почётной грамота Губернатора Ямал мувев эӆты юкантам. Щи тумпина ӆув Ветеран труда па Ветеран Ямала нэм тайӆ. Няврэмӆаӆ вещката энмаӆтмаӆ ураӊна кат «Медаль материнства» мойӆаман тайӆ.
Тампуш сус пораян Валентина Алексеевна 79 таӆ сэма питам хатаӆ постаты питаӆ. Папуш па ӆув нийӆъяӊ таӆа йиӆ, ун юбилей постаты питаӆ. Щи арат таӆа ванамамн ӆув хоӆна рупитты верытӆ. Энамты хоятата щимащ хоятат пеӆа мосаӆ вантман уӆты па рупитты.
Яна щи, нэ ёшатн уӆапса еӆӆы хатаӆ. Хота нэ ёш катӆасаӆ, иса туӊа манаӆ. Тамащ юраӊ па вещкат нэӊиет вуӆы тащ хотатн уӆӆат па рупитӆат. Хоӆна ар ӆув эӆтыӆаӆ рахаӆ ханштыя. Ат еӆӆы тумтака уӆӆат!
Иван Сандрин ханшам потар
Авторы
Лух Авт
Темы