Лух Авт
Вещката верты рупатайӊан
Хащам ӆапатан аматты айкеӆан ёхатсаюв. АНО «Ямал-Медиа» хоща рупитты ху Андрей Швецов «Новая реальность» мир ӆоват манам касапсайн «Говорящий с природой» верам кинайӆ пиӆан оӆаӊ тахая этас. Рупатайӆ «Человек и природа» номинацияйн воӆаӊ мойӆапса шитас.
Нёхты хораӆан Лазарь Михайлович Еприн эӆты потар манаӆ. Ӆув Щаня муван сэма питас, щита энмас па ашкуӆайн утаӆтыйс. Охотовед рупата пеӆа утаӆтымаӆ юпийн, «Йиӊки ӆор» войт шавиты харан ар таӆ рупитаӆ. Там ханты хоятэв рупатайӆ шеӊк самаӊа тайӆаӆӆы. Ханты муван энамман, ай тэӆан войт хоща утаӆман уӆ. Щи вой энмаӆты па шавиты хараӆан хуваӆта тувам овцебыкат, як па бизон нэмпи мисат, ӆоват уӆӆат. Щитӆаӆ эӆты вантман, торанан, соӆан понман, шукаӆам пушас ӆэщатман, Лазарь Михайлович куран, хота па ӆов шаншан кашӊ хатӆ ар километра яӊхиӆыйӆ.
«Еӆпи аӆ хоятат тый ант эсӆысайт. Там йисан па арсыр экологической юшат пуншсайт. Хор вуйман па аӆ шушиӆыты хоятат щутщаты ёхтыӆыӆат. Щи кеша тата ат хоӆты па лёхитыты хотыет омассайт. Ӆуӊ сыс волонтёра рупитты айӆат ёх тата уӆӆыӆат. Вератты кеман пушасӆув ӆэщатӆат. Ӆэвас хоят войт хоща вана ант эсаӆӆув. Манэм тата, хар тахайн ям рупитты. Войӆам пиӆан потрэмиӆам. Ӆув па ма тур сыем хоща утаӆсат. Вана йиӆат», — Лазарь Еприн ястас.
Хор вуйм порайн, Максим Сандрин рупитас. Ӆув Пулӊават вош эӆты. Нёхты хор вуты хоята АНО «Ямал-Медиа» хоща рупитаӆ.
«Верты рупатаем самема шеӊк рахаӆ. Хор вуйман, тухаӆ ишан ӆаварт куш уӆӆыйӆ, туп ищипа матты ки ма щутщаӆам. Ма ащем пиӆан ай тэӆан акиӆам па имайӆам хоща тащ хотата па куртата яӊхсам. Вой па хуӆ веӆпасӆаты рупата уйтӆэм. Хун тамащ тахаята хор вуты яӊхӆув, ӆыпеман амтатӆыӆам.
Йиӊки ӆоран нёхты хор вуймеман еша ощхуль ус. Тухаӆ хорӆам нумаӆта вантты щиран версаӆӆам. Щи кеша квадрокоптер тайӆув. Хошапем вана ёхаттаӆан, войӆув паканӆат. Муӊев, ванты, мосас, войӆув ещаӆт ат хухаӆӆат, ӆув па шаншан манӆат. Щит ураӊан хорам кина тыйты ураӊан, ар пуш хор вуты мосас.
Кинаев таӆаӊа йитаӆ ураӊан ар хоят рупитаӆ. Мет воӆаӊ куща — щит номас понам хоятэн. Щаӆта хор верты, машинайн рупитты, хор па сый похла акатты хоятат па уӆӆат. Вет-яӊ минут хорам хор вантты ураӊан, таӆаӊ ӆапат, хота па тыӆащ рупитты мосаӆ», — рупатайӆ эӆты Максим Сандрин потартас.
Там кина тумпийн, арсыр касапсаята пиӆтащийм рупатайт оӆаӊ местаята па этӆысат. Щимащ рупатаятан хор вуйман, Максим ищи ус. Рупатайӆ самаӊа туты айӆат похев хоӆна ар хорам нёхты хор ат вераӆ. Ханты хоятӆув, нэмӆаӆ мир ӆоватан ат щащӆат па иса ат уйтӆайт.
Зоя Куртямова ханшам потар
Авторы
Лух Авт
Темы