Лух Авт
Ветъяң пеӆа вет таӆ няврэмат пиӆан рупитаӆ
Татьяна Ивановна Петрачук Ӆорвошан сэма питас, утаӆтыйс па куртаӆа ёхӆы рупитты ёхтас. Няврэмат пиӆан ветъяң пеӆа вет таӆ рупитаӆ. Щёхар тыӆасян ветъяң пеӆа хуӆам таӆа йис, хоты садикан воспитателя уӆ. Хоӆна кат таӆ Тазовской районан Находка куртаң няврэмат ашкуӆайн утаӆтас.
Рупатаеӆ эӆты потар тус: «Ма ар таӆ воӆаң воспитателя усам. Си тумпийн яң таӆ ашкуӆая манты няврэмат пиӆан туп рупитсам. Хун воӆаң воспитатель ставка нох вуса, воспитателя понтсайм. Си еӆпийн муң муң сирэван рупитсув. Муң куся нэ тайсув. Ин ашкуӆая ӆуңтасӆув. Рупатаев па сирн манаӆ.
Там хатӆатан хольмаң пеӆа хуӆам няврэм яңхаӆ, кеншак. Няврэмӆам, хоӆ ямат, аңкиӆаӆ-асиӆаӆ па. Манэма ӆув пиӆэӆан кен рупитты. Группаеван няврэмат няӆ таӆ эӆты хут таӆ унты уӆӆат. Кашң хатӆ хуӆам занятий верӆув.
Ма няврэмат пиӆан кашң таӆ «Нох питам тови» проектан касӆув. Куртэв эӆты Ун Лялян уӆам хоятӆув эӆты хор нэпек ӆэсятсув. Си тумпийн лялян уӆам хоятӆув нумты нэпек туӆув. Кашң таӆ моӆты яӆап от тохи ханшӆув. Стенгазета ӆэсятӆув. Эвиет па похиет пиӆан Ун Ляль емаң хатаӆан ӆуңтар конкурс верӆув: нэпек ӆуңатты хотан, ай няврэмат пиӆан рупитты хоятат вохӆув. Кашң группа эӆты йи няврэм ӆуңтар ӆэсятаӆ, йи нох питам няврэм пирыӆув.
Садикев «Шовар» нэм тайс. Кашң тыӆась нэпек эсӆысам, муй тыӆась сыс версув, этаӆтысам.
Альбина Тырлина ханшам потар
Авторы
Лух Авт
Темы