Лух Авт
Воӆаң Ляльна нох питам 79-мет таӆэв постаӆэв
Мув ӆоватан, Россия ӆоватан, кашң куртан па вошан Воӆаң Ляльн нох питам верэв — мет воӆаң емаң хатӆа ӆуңатӆэв. Ун овращӆув, ун ащикиӆув лялясам онтасан муң там хатӆатан шук ант вантман уӆӆув.
Кашң таӆ ашкуӆа па садик няврэмата там воӆаң емаң хатӆ эӆты потартыӆа. Куртаң муй па вошаң хоятат эӆты, хой Воӆаң Ляля яңхиӆыйс, ясаң тувиӆыӆа. Щи веран няврэмат там шукаң вер ант ёрэмаӆэӆ, самӆаӆ хошиман ӆуңтарат па арат утаӆтаӆат. Аңкиӆаӆ-ащиӆаӆ эӆты ун овращӆаӆ, ун щащиӆаӆ уӆапса эӆты ясаң хуӆӆыӆат. Георгиевской ленточка сам пуңӆэӆа тахарман шушиӆыӆат.
Хонна хащсат хоятат, хой ащиӆаӆ Воӆаң Ляля яңхсат. Пулңавт вошан Тамара Александровна Кондыгина уӆ. Ӆув ащеӆ лялясыйс па ёхи ёхтыӆыйс, щит эӆты каматса ясаң ястас: «Ма ащем Александр Филиппович Кельчин Воӆаң Ляля яңхиӆыйс, мушмиӆыйс. Щишан, 1943-мет таӆан ёхи ёхтас, щи еӆпийн таӆаң таӆ госпитальн ус. Ёхатмаӆ юпийн веӆпасӆыйс, муңев энмаӆтыйс. Муң Кельчин рутэв эӆты шеңк ар хоят маныӆыйс, куртӆув иса таӆапсат. Ар пелак ёхев ёхи ант ёхтыӆыйс, ушиӆыйс. Ащем апщи Сергей ищи ляля тутӆыса — щита щи ушас. Ӆапатхощъяң таӆан тувам. Ин там воӆаң хатӆэван иса аратаӆ рутэв кащтыӆыӆэв, нумаӆмиӆэв».
Панаевск эӆты Галина Михайловна Уксюмова пиӆан потартысам, ӆув ащеӆ Воӆаң Ляля яңхиӆыйс, ёхи ёхтыӆыйс. «Ма ащем Михаил Максимович Уксюмов ляльн ус, Европа аратаӆан яңхсаӆӆы, Берлин унты ёхтыӆыйс. Тумтака ёхи керӆыйс. Ин хащам ятан СВО щира питсув, муң ёх апщиӆув эӆты хащам мет ай Коля апщев ищи лялясты манас, куш ветъяң моӆтас таӆа йис, ищипа вуратас, актащас. Муңев хун хуӆатаӆ? Тумтакаӆан ёхи ат ёхатаӆ!»
Ас нопатты яртъяңмет хатаӆ муң хон мувев ӆоватан шеңк вутңат постаӆа. Пулңават вошан ищи ар хоят яха актащийс. Вошхулэт хуват ям потар, ям номас тайман ар хоятэв шушас. Кев хар хоща ӆыӆаң лыптат поныӆысат, сэмъйиңк муңхиӆысат, парам хоятӆаӆ нумаӆмисат. Там шукаң вер энамты мохетна нэмоӆты порайн ант ат вантӆа.
Аллина Тоярова ханшам потар
Авторы
Лух Авт
Темы