Лух Авт
Воӆаӊ нётопса вераӆ
Пулӊават вошн «Мувхор» садикан Маргарита Петровна Батютенко (Возелова) воспитателя уӆ, ай эвиет па похат пиӆан рупитаӆ. Рупитты тахаеӆан «Тундровичок» нэмпи пормас шавиты хот пуншас. Сита уйтантопсайт верӆат, емаӊ хатӆат постыӆат, мойӊ хоятат пиӆан уйтантыӆат.
Хасям ӆапатан пормас шавиты хотан «Овас мувие» нэӊат пиӆан мастер-класс ӆэсятас. Еӊта пасан суран потар тувман, СВО хося уӆты хоятата пормасат понты хирыет ёнтсат па мойӆапса ӆарась акатсат. Кашӊ ёхтыӆыйм нэ моӆты мосты пормас ёх хоятӆува ӆэсятас. Ёнтам хирыета мосты пормасат понтсат.
Маргарита Петровна СВО хося уӆты хоятата оӆаӊ хатӆ эӆты нётты питас. Сит эӆты ӆув ястас: «Ма рутӆам кутан ляль манты харан ар хоят уӆ. Оӆаӊ хатӆат эӆты вошеван верты нётопса тахаята мохты пиӆтасьсам. Тохи яӊхты хоятат пиӆан паркан эӆты посат, сэвам вайт сэвты питсув. Садикан чебурашка ар ёнттот ёнтсув, китсув. Муй иса верӆув. «Доброварежка» акцияйн охаӊ сертификат шитсам, охӆаӆ СВО хося китсаӆӆам. Муй арат хоӆап сэвсув, балаклава ёнтсув. Ма атэӆ йи хоӆап ӆэсятсам. Кашӊ порайн пормасат китӆув. Хун кум тайӆам, иса нётӆам. Там уйтантопсайн си тахайн уӆты хоятӆува ханты нэӊӆув пиӆан мосты пормасаӊ ӆарась акатсув. Яӆап таӆ емаӊ хатӆ еӆпийн ляль харан уӆты ёхӆув мойӆапсайӆув шитӆат.
Хоӆна ястаты утсиӆам, ма Пулӊават вошн торах муш леккар хотан уӆты шоши мир ёх няврэмата нётӆам. Ӆувиӆаӆа шеӊк ар ант мосаӆ. Сэвам вайт, ай кащат, эвета па похата ернасат акатты рахаӆ. Хой муйн нётты верытаӆ, няврэмӆын эӆты хасям ям ӆуматты сохат, пормасат туты рахаӆ. Яӆап таӆ емаӊ хатӆ ванамаӆ. Си няврэмат па мойӆапсайт ӆаваӆӆат. Кашӊ хоятэв ӆувиӆаӆа нётты верытаӆ».
Ма Маргарита Петровна мойӆапса ясаӊан ястаты утсиӆэм. Тумтака уӆа, наӊ верты верэн еӆӆы кеншака ат манаӆ. Хун симась хоятат уӆӆат, хой нётапсайӆ сам эӆты манаӆ, си хоят нэмоӆты паӆтап ант тайӆ, верты вераӆ туп ой па амат туӆ.
Альбина Тырлина ханшам потар
Авторы
Лух Авт
Темы