Лух Авт
Вой энмаӆты ёра вер
Энмаӆты войт хотвоӆан тайтыйн, йи тахайн ант омасӆа. Туп новия хутӆыты питаӆ, нох киӆты мосаӆ. Ӆэты пасаӊа омастэн еӆпийн, войӆан ӆапатты. Хатӆ сыс рупата тэӆые. Овкуртан уӆты ху – Владимир Налимов щимащ рупата эӆты ант паӆаӆ.
Имоӆты порайн Владимир хотан тайты хуӆам шовар энмаӆты вус. Щи пора эӆты вет таӆ хащас, войӆаӆ ара йисат. Ин ӆув хуӆам ху па хус пошах туты щищкурэк, хольмаӊ пеӆа вет шоврые, кат альпийской па кат зааненской порода эӆты ошат тайӆ. Там ванан шоварӆаӆ пошхаӊа йисат.
«Оӆаӊ сыс войӆам энмаӆты вуймеман, районан манты касапсая нэпекӆам ӆэщатысӆам. Щиӆта нётапса грант ох шитыӆысам. Щи охӆаман, войӆам уӆты, торн шавиты ят пиӆан хот версам, пушас ӆэщатсам, ярсот щищкурэк пошах ипуляӊ энмаӆты хошап ӆутсам. Войиеӆам тумтак энамсат. Ин ма ёра вер туты хоята ханшӆтантысам па яӆап щиран кимет пуш касапсая нэпекӆам маты утщиӆам.
Манэм нётты хоятӆам, щит Алёна имем па Егор апщем. Войӆама хот вермеман, апщеман иса нётсайм. Оӆаӊ сыс ӆаварт ус, юхат утӆапсам па щиты щи войӆам пиӆан волкемиӆам.
Хащам таӆ сыс хольмаӊ киӆа шовар нёхи па хуӆам щёраскем щищкурэк карӊ пошах куртаӊ хоятӆаӆа тынысам. Шоварӆам еӆӆы энмаӆты тумпийн, хоӆна па аӆ ёӆан тайты ураӊан, ӆутӆайт. Няврэмата шеӊк умащ тамащ ӆэпат пунаӊ войиет еӆан тайты», — Владимир Александрович ястас.
Еша кепа куртаӊ мохиӆаӆ аӆаӊсахат щищкурэк увты сыйн аӆаӊ куртӆайт. Ищи па Владимир эӆты ар ям пумащипа ясаӊ ястаӆат. Аӆ ёӆан омасман моӆты вер хун тыйӆ. Ох ёша пайтты ураӊан, ар рупитты мосаӆ.
Зоя Куртямова ханшам потар
Авторы
Лух Авт
Темы