Лух Авт
Вой веӆты пора
Кашӊ тови ёх хоятат шеӊк самаӊа ӆавӆасӆат, хун тохӆаӊ войт ёхатӆат. Щи кеша ротая мосты пормасӆаӆ ӆэщатӆаӆӆаӆ. Туп пора ёхатаӆ — мохты унта манӆат. Щиты куртаӊ па вошаӊ ёх ёӆан каматса ӆапат ант ныӆайт.
Тови пора, муӊ мувеван, кашӊ хоят яӆап таӆ емаӊ хатӆ иты ӆаваӆаӆӆы. Хатӆат хува йисат, мелак пора ёхтас. Щутщаты хатӆатан хоятат рупитты ким этсат, хой картопка харӆаӆ ӆэщатаӆ, хой ов харӆаӆ сыстамптаӆ, хой па унта актащаӆ.
Тови вой веӆты пора — шеӊк ям пора. Таӆ порайн омасты метӆа, шука йиӆ. Каш верман, пора хайман унта яӊхӆа. Товийн унтан шеӊк умащ, яӆап торнат этӆат, щищкет щёвиӆат, камн хорпи ар вой нох этаӆ. Номас ям.
Куртаӊ, вошаӊ ёх самаӊа унта вой веӆты манӆат. Таӆ сыс айӆта пошканӆаӆ туӊа-щира ӆэщатӆаӆӆаӆ. Патронат ӆутты ун вошата яӊхӆат. Хой кум ант шитаӆ, ёӆан вераӆ, туп пошкан нёӆ па щеля мосаӆ. Тови кеша ёх хоятат, хой рупитаӆ, нэман рупата эӆты щутщаты хатӆат вуӆат. Уншак ёх, хой пенсияйн уӆӆат, аӆ щиты ант омасӆат. Ӆув мет оӆӊа унта манӆат. Сохаӆ хотӆаӆ мосты щира ӆэщатӆаӆӆаӆ, сорам юх акатӆат, иса муй мосаӆ верӆат.
Там йис муй мосаӆ ӆэщатты
Тампуш вой веӆты пора Ас нопатты 16-мет хатӆ эӆты па ущ тыӆащ 5-мет хатӆ унты пуншман питаӆ.
Тови сыс ёх хоятат морт-араткем вой мощатӆат. Яӆап васы нёхи пиӆна ёхи ёхатӆат. Хой аӆ щиты потам хота понӆаӆӆы, мосты порайн ким таӆӆаӆӆы па кавартӆаӆӆы. Хойтат нёхи хошап верӆат. Щит мет ям эпӆаӊ ӆэтот, ӆуӊ сыс сопасӆыман тайты рахаӆ, потам хот ант мосаӆ. Щиты вуӆэӊ ёх верӆат.
– Ма кашӊ тови сыс кум шитман, вой веӆты унта яӊхӆам. Ай тэӆан ӆухасӆам пиӆан щиты утаӆсам, — Алексей Лонгортов ястаӆ. — Унта манты еӆпина, оӆаӊан, пошкан нэпекат туӊа-щира ӆэщатты мосӆат. Щи тумпина охотничий билет па мосаӆ. Антом ки, мильцайн катаӆӆайн, пошканэн нох вуӆа. Кашӊ пошкан утща нэпек тайӆ. Унта манты ураӊна нэпек ханшӆтаты мосаӆ, хота ханшман уӆ, муй арат васы па ӆунтат наӊен мощатты рахаӆ. Щи нэпекӆан иса патан тайты мосӆат. Унтан ки мильцайн кащаӆаӆайн, нэпекӆан этаӆтыӆӆан. Туӊа-щира ки ӆэщатысан, еӆӆы эсаӆӆайн. Щишан, нэпек тайман, ант хурыман вой веӆты манӆан. Ма васы мощаттэм юпийн, омастэм сыс, мохты нох сухатӆэм, пунӆаӆ унтан хайӆаӆӆам. Ёӆан ищи рупатайӊ сухатты, пунӆаӆ ты-тохи хот хуват туӆайт. Тамиты ям, ӆэщатам васы мохты потам хота понӆэм, мосты порайн ким таӆӆэм, кавартӆэм. Яӆап ӆант ӆэвман нумаӆмаӆам, хоты яма унта яӊхсам.
Иван Сандрин ханшам потар
Авторы
Лух Авт
Темы