Лух Авт
Волноваха няврэмат Муши воша ёхтыӆысат
Ляль манты муватан Волновахской район муң округеван нётман тайӆа. Таӆ сыс щита уӆты няврэмат шоши мувев альман округ хуват тутӆыӆайт.
Там ванан каматса хоят Ӆорвош муват вантты ёхтыӆысат. Район кущаев Олег Попов пиӆан уйтантысат, потрэмасат. Нэмоӆты порайн ёхан хуват тутаң хопан ант яңхман, няврэмата ощхуль ус Ас хуват метеоран манты. Там пуш пуншам айӆат ёх касты па каш верты хота тутӆысайт. Щита «Муй? Хота? Хун?» нумасты ёнтопсайн ёнтсат, ляль харан уӆты мохет кеша сай верты хоӆап хушсат. Кимет хатӆ Ханты-Муши курта яңхсат, Инна па Леонид Лонгортовңан хота ӆоңтысат.
«Мойң хоятата ханты уӆапса альты ураңан хотэман пуңаӆан нэман вуӆы хот омассаман. Ӆуңан парщинан лакман уӆ, таӆан вуӆы сох эӆты верам нюкийн. Хув мув эӆты ёхтам мохета, Инна ийимем пиӆан, потартсэман хантэт щит хойтат па муй хорпи муң уӆапсаев. Няврэмата шеңк ощхуль ус хуӆантты па вантты, верам пормасат ёшан кетамты, ханты сохат нох ӆуматты па хор верты. Ох веӆам шукатты мутрайң отатан ёнтсат. Ма ӆувиӆаӆа мастер-класс альсам. Кашң няврэм ӆувеӆ «Вет ӆов тын» ёнттот верас па мойӆапса юкана патан вусӆы. Хуван хорпи сол понты ай аныетатан па мойӆасӆаман. Хот ӆыпийн ханты пасан суран каврам шайн йинщӆтасӆув», — Леонид Петрович ястас.
Аӆ щиты уӆман, там няврэмат, хун ӆуӆан там муват пеӆа ёхатсат. Щиты тутӆыман кушкепа уйтты питӆат, муй хорпи ханты хоятат уӆӆат. Хоты ӆув хорамаң сохат ёнтӆат па тайӆат, тус ёшан вератты хошӆат.
Зоя Куртямова ханшам потар
Авторы
Лух Авт
Темы