Лух Авт
Вонщамот вонщиӆыӆув, толах актыӆыӆув
Там таӆан, туняӆ эӆты артаӆаман, мув ант хохатаӆ, кашң хатӆ ерт щёшийӆ, муваӆ мораӆтыйӆ. Щи веран унтан энамты ӆэвпасэв яма энамаӆ. Кашң хоят соцсетятна мурхаң путат, толхаң йиңӆат мира этаӆтыйӆ.
Щишан, хой Интернета ӆоңемийӆ, кащаӆаӆӆы: мата пелак муван вонщамот пошас, толах энмас. Порая йис, ищи унта па нюрма актащты мосаӆ. Сыстам унт хуват шушиӆыман эӆэн таксара йиӆ, номпсэн сыстампӆэн. Ищимет иуӆтыя яӆпиӆасан, щёмаңа па юраңа ювиӆысан.
Хоты катра порайн хоятат унта яңхиӆысат, щит эӆты Ольга Николаевна Тоярова (Хунзи) каматса ясаң ястас: «Уйт ӆор тыӆащан муң кашң пуш Ӆоркурт пуңаӆан уӆты нюрмата яңхиӆысув. Каматса километрайн хопан маныӆысув. Пана хойтэв юпийн пасан верыӆысув. Ванты, ӆуңхӆув ат сыйемиӆат, ям вонщапаң хар ат алемиӆат. Пусаң манты юпийн, шай йинщемисув па вонщамот актыӆысув. Ямас акаттэв юпийн, хопева ӆэӆӆув па ёхӆы пеӆа тэӆаң хинтӆув пиӆан щи манӆув».
Там лопса тампуш верам хорат поныӆыӆув, актам ӆэвпасӆув алиӆыӆув. Нын ищи унта шушиӆыяты па таӆ кеша ӆэвпас актыӆыяты. Тэӆаң путӆан пиӆан ёхӆы ёхтыӆыяты.
Аллина Тоярова ханшам потар
Авторы
Лух Авт
Темы