Лух Авт
Вонщасты порая щи йис
Хошам па ертаӊ хатӆат уӆам онтасан унтатн ӆэвпасат яма энапсат. Аратаӆ мир толах, восты вонщамот па мурах акатты яӊхаӆ. Там лопса муӊ газет ӆуӊатты хоятат хорат понӆув. Нын вантаӆан, яӊхтан порайн ищи хор верыӆыяты па муӊев китыӆыяты.
Хоӆ муӊ ай тэӆан яма уйтӆув, муй хорпи вонщамот акатты рахаӆ, туп толах верэв шеӊк ванан ант тайӆэв. Щишан нынана мосаӆ уйтты, муй хорпи толах акатты рахаӆ па муй хорпи ант рахаӆ.
Юш пуӊаӆан па хулэӊ унтатан толах акатты ант рахаӆ. Ванты ин хоятат хува унта ант яӊхиӆыӆат, иса юш пуӊӆатан акатӆат, хота машинайт яӊхӆат. Щи веран еӆшак нюрма па унта манты мосаӆ.
Актам толхат ант мосаӆ кар соха понты, карты пута — ванты, ӆув сора атма йиӆат, мосаӆ аӆ сэвам хинтата поныӆыты. Ищи хатаӆан мосаӆ яма сыстапты, каварты, шарытты. Яма ӆэщатты юпийн мосаӆ потам тахая понты муй па омасты.
Ёш эӆты ӆутты ант мосаӆ. Хой уятаӆ хота актыӆысайт. Щи вер эӆты хурыманшак уӆаты. Шеӊк толах ӆэты ки ӆаӊхаӆайты, ӆапкайн ӆутаты.
Тумтак ёшна, тумтак курна нын унта шушиӆыяты па вонщапсайт актыӆыяты. Сыстам унтан ӆаӆмияты, ӆэвпас сопасӆыяты.
Аллина Тоярова ханшам потар
Авторы
Лух Авт
Темы