Лух Авт
Ворӊа хатӆэв кашӊ куртан па вошан хонна постаӆа
Тампуш, тутаӊ ищки хатӆат юпийн, роман мелак па хошам хатӆат ёхатсат. Щи мелак хатӆат пиӆна па ворӊайт Овас мув пеӆа йисат. Щишан, хой тахаятан тухаӆ мохет нох аматман емаӊ хатӆэв оӆӊашак постасэӆ.
Мет оӆӊа, катра йис эӆты, Ворӊа хатӆэв постаса хун нови атаӊ хатӆат этты питсат, хун оӆаӊ ворӊайт ёхатты юпина тыӆащ энамты питас — щи хатаӆн щи емаӊ хатӆ ӆэщатыса. Щаӆта еӆӆы, хун Овас мува рущат ёхатсат па ӆув емаӊ хатӆэӆ постаты питсэӆ, щиты кат емаӊ хатӆ воӆӆы илеп ванан питсат. Благовещение нэмпи емаӊ хатӆ 7-мет хатӆ ун кер тыӆащн порыӆыӆа, щишна щи Ворӊа хатӆ ищи хатаӆна постаты питса.
Ӆовош район Ханты-Мужи куртна хащам ӆапатан Ворӊа хатӆ постаса. Мойӊ хоятат, кум шитман, Васьёханов па Мужи эӆты ёхтыӆысат. Турам пеӆа пойкащсат, нэман ӆэщатом эпӆаӊ ӆэтотат тутӆысат па порыӆысат. Кашӊ хоттэӆ ёх щашкан шук карты ох пиӆна сумта ярсат.
Кев сыӆ район Охсарвош унт пуӊаӆна хантэт па ур ёх емаӊ хатӆэӆ ищи постасэӆ. Оӆаӊна турам пеӆа пойкащсат па сумта щашкан шукат ярсат. Районной каш верты хот эӆты рупитты ёх касапса па араӊ-монщаӊ ёнтапса ӆэщатсат. «Овс мув нэ» ханты араӊ группа па «Ялэмд» ур ёх араӊ группа хорам арӆаӆ пиӆна нох ӆоймтысат.
Щи хатаӆна хоӆна пирыса, хой мет хорам ворӊа хорпи сох ӆэщатас, па хой мет эпӆаӊ ӆэтот кавартас. Алла Тайшина па ӆув Никита хиӆэӆ пиӆна нох питсаӊан.
Там ӆапатан Ворӊа хатӆэв хоӆна постаӆэв, щутщаты хатӆатан шоши хоятӆув уйтантыӆат па порыӆыӆат.
«Сорни най» Нижневартовск вошан
Ханты арат арыты нэӊат Ӆорвош эӆты Ёмвош мува яӊхсат. Нижневартовск вошн ай кер тыӆащ 4-мет хатаӆн Ворӊа хатӆ постаса. Аратӆ тохи кат щёрс ветсот моӆтас мойӊ хоят ёхтыӆымаӆ.
– Хун емаӊ хатӆэва ӆэщатыты питсам, ма нумассам, мосаӆ рут мувем, Ӆорвош районэм эӆты ханты хоятӆув вохтыя. Щиты «Сорни най» араӊ нэӊат Ӆорвош эӆты ты йиты номас понтсат. Щишн, ох кашты питсам. Манэма «Роснефть» хоща уӆты «Самотлорнефтегаз» эӆты нётап верса, 200 щёрс соӆкувайна масайм, — Екатерина Сергеевна Жукова (Хунзи) ястаӆ. — Щи охӆамна касапса версам, хой хорамшак ворӊа ӆуматты сох ӆэщатаӆ. Нэман мойӆапсайт ӆутсам. Щаӆта вохам мойӊ хоятӆам ураӊна манты юшӆаӆ па 2-3 хатӆ уӆты сыс сохаптысӆам. Шеӊк умащ, хоты муӊ шоши хоятӆув ханты ясаӊна арысат па яксат.
– Муӊ шеӊк яма яӊхсув! Туп вохсаюв, мин 8 хоят, мохты кашащсув! Щикем ям, умащ ус па мува яӊхты. Ханты арӆув па якӆув этаӆтысӆув, — опи сакӊан, Валентина па Любовь Кондыгинӊан ястасӊан. — Ворӊа хатаӆна ар хоятат пиӆна уйтантысув па потрэмисув. Иса тый-тохи яӊхам юшев пайӆы ус! Папуш па тамиты мосаӆ уйтантыты!
Иван Сандрин ханшам потар
Авторы
Лух Авт
Темы