Лух Авт
Воспитателят кутан манам касапса
Хасям ӆапатан Ӆорвош район Васьёханов ашкуӆа-интернатан рупитты воспитательӊан Раиса Александровна па Ольга Ивановна Коневӊан «ВерШИны Ямала-2025» педагогической мастерство округ касапсайн кассаӊан.
Там пуш сита хуӆамхосьяӊ хоят касас. Рупатаеӆ хуват ар хорпи верат ӆэсятсат па этаӆтысат. Касапсайӆаӆ хуӆам этапан заочной па очной сирн мантсат. Раиса Александровна па Ольга Ивановна округ вет хоят кута этсаӊан, лауреата йисӊан.
Ма Раиса Александровна пиӆан потрэмисам. Ясӊаӆ эӆты: «Касапсаев хуӆам этапан манас. Онлайн сирн визитной карточка китсув. Потрэм интернатан уӆты няврэмат эӆты тусэм. Си юпийн, ветхосьяӊ инсясапсая ёхӆы маты потрат масам.
Кат этап очной сирн манас. Жюри ещаӆ няӆ заданий этаӆтысув. Сита ма презентация няврэмат уӆапса эӆты ӆэсятсам, нёхты хор версам. Кимет этапан хут инсясапса эӆты, манэма хойс, хоты няврэмат интерната ёхатты юпийн, сита уӆты утаӆтыӆат. Си тумпийн округев эӆты ёнтапса ӆэсятсам па Овс касапсайт эӆты мастер-класс альсам.
Кашӊ хоят, хой няврэмат пиӆан рупитаӆ, верты рупатаеӆ уятӆаӆӆы. Там йисан онӆайн сирн ар хорпи касапсайт манӆат, интернатан уӆты няврэмӆув иси тохи пиӆтасьӆат.
Ай куртатан рупитты хоятат ар рупата няврэмат пиӆан верӆат, уйтантопсайт, вантопсайт ӆэсятӆат. Сишан ма нумасӆам, ӆаварт ант питаӆ. Туп паӆты ант мосаӆ, си порайн иса тыйӆ».
Альбина Тырлина ханшам потар
Авторы
Лух Авт
Темы