Лух Авт
Вуӆэӊ ёх емаӊ хатӆат манӆат
Кашӊ таӆ тасян яӊхты хоятат мет оӆаӊан Надымской районан уйтантыӆат. Хасям сютсяты хатӆатан си муван вуӆэӊ ёх емаӊ хатӆ постаса. Округ кусяйн аратаӆ мир мойӆапса ясаӊан ястаса.
Тампуш Надым вошан, ХХХ-мет округ куся Кубок касапсайт мантсат. Ияха 19 команда, 190 хоят ус. Ямальской район туп 8 команда этаӆтыйс, Тазовской — 4, Надымской — 3, Ӆорвош — 1, Приуральской — 1, Пуровской — 1, Ёмвош — 1. Тампуш нэӊат оӆаӊ пуш юх таӆман кассат. Хольмаӊ пеӆа кат нэ ханшӆтыӆыйс.
Кат хатӆ сыс вуӆы тащан яӊхты хоятат, округ хуват северной многоборье сирн касты энамты шоши мир ёх юрӆаӆ артаӆысат. «Кочевая семья-2026» касапсайн пиӆтасийм хоттэӆат уӆапсаеӆ, хорам сохӆаӆ, пормасӆаӆ, тусӆаӆ, вуӆы ухаӆӆаӆ этаӆтысат, арысат па яксат.
Си касапсайн кат ханты хоттэӆ оӆаӊ тахая этсаӊан — Климоват, Приуральской район, Байдарацкой нюрм эӆты па Талигин рут хоттэӆ Ӆорвош район, Мужи курт эӆты. Муӊ па ӆувиӆаӆ мойӆапса ясаӊан ястаӆӆув. Тумтак ёш, тумтак кур!
Там манты касапсайт мет вантман тайсайт. Емаӊ хатӆа касты ёхтыӆыйм хоятат, вуӆыӆаӆа ветеринарной контроль па вакцинация верты мосас. Шоши мир хоятата медицинской справка па страховка ӆэсятты, мет хорам сохӆаӆ ӆуматты.
Хасям таӆатан вуӆы ёх емаӊ хатӆат мет воӆаӊа, ольпаӊа верӆайт. Хон мувев па па хон муват эӆты ёхтыӆыты мойӊ хоятата хорам, иськи мувев, шоши мир хоятӆув, уӆапсайӆув альӆайт, вуӆы хота тутӆыӆайт.
Куш камн сикем иськи ус, тум исипа ар вошаӊ па мойӊ хоят ёхтыӆыйс. Ар нюки хот ӆонсиӆыса. Кашӊ хоят тохи ӆоӊематы верытас: хошмаӆтыты, шай йинсематы, хуӆ, нёхи эӆты кавартам ӆэтот умасьӆыты. Няврэмат кеша ёнтты харат рупитсат, тынасты харат ӆарпитман усат. Кашӊ хоят моӆты ӆутты верытас.
Кат тыӆась сыс вуӆы шавиты ёх округ хуват манты емаӊ хатӆатан яха уйтантыты питӆат. Ар тахайн касты па мойӆаты ёхтыӆыты хоятат яха ёхтыӆыӆат, рутӆаӆ, ӆухасӆаӆ пиӆан уйтантыӆат, хорам емаӊ хатӆат умасьӆыӆат.
Альбина Тырлина ханшам потар
Авторы
Лух Авт
Темы