Лух Авт
Вуӆэӊ ёх кеша верты пормасат
Округ кущаев партапса хуват, 2021-мет таӆ эӆты тащ хотатан касаӆман яӊхты айӆат ёх хоттэӆата «чумовой капитал» маты питса. Тохи ӆуӊтасты ар пелак пормасат ёшан верӆайт. Щи кеша, Овс мув шимӆаӊ мир ёра вер туты ёх па общинаята пиӆтащам сот моӆтас хоят щи воӆаӊ вер туӆат.
Пормас ӆэщатты рупата таӆ сыс манаӆ. Сус эӆты тови унты вуӆы сохат акатӆайт, хотхар сохӆа рахты па ул юха ӆэщаӆаты юхат эватӆайт. Хошам хатӆат ёхатты порайн, пормасат мосты щира ӆэщатӆайт.
«Ханты хоятат ай тэӆан верантты хошӆат. Мет оӆӊа ёнтман, ай ухӆыет, хотыет верӆат. Уна йитэӆан, ёшан туп ӆайм па кеши тайман, ӆувиӆаӆа мосты вуӆэӊ ухӆат, лак кеӆат, улат, ныр юхат ӆэщатӆат. Ӆуп, ӆох, пасан, уӆас, муй пормас юх эӆты, щит иса ёшан щи верӆа. Хот лаӊкты сох ӆэщаттыйн, рупатайӆ ищи ар па ӆаварт. Сох сораӆты, ёталты, татаӆты, ёнтты мосаӆ. Щи ёш рупата иса нэӊатан верӆа.
Куртатан уӆты ёх, тамащ рупата верман, кушкепа еша ох шитӆат. Таӆ пенсия хоща, моӆты нётапса. Щи тумпийн па нёхратты рупатаен ант ёрэмаӆэн, айӆат ёх утаӆтаман верэн еӆӆы туӆа», — еӆпи Мужевской совхоз тащ хотан яӊхам ху Эдуард Сандрин ястас.
Кев сыӆ районан па Янна Кондыгина, Виктор Лаптандер, Пётр Худи, Анатолий Тайшин, щаӆта па МУП «Паюта» хоща рупитты ёх тамащ рупатая пиӆтащман уӆӆат.
Янна Кондыгина Сергей ийикеӆ пиӆан Зёлёный Яр курт эӆты. Яртъяӊ таӆа йис, хоты ӆын шоши мир хоятӆува нётап туӆӊан. 2021-мет таӆ эӆты сот ветъяӊ ухаӆ версаӊан. 2026-мет таӆан яӆап нэпек ханшсаӊан, таӆ сыс хутъяӊ пеӆа няӆ ухаӆ верты мосаӆ.
Ӆорвош районан тамащ тус ёшаӊ хоятат па уӆӆат. Ӆув кутэӆан Антон Иосифович Сязи. Еӆпи ООО «СП»Горковское» тащ хотатан рупитас. Ар таӆ бригадира ус. Пенсияя манмаӆ юпийн, Питӆор куртан уӆ. Рупитты утӆам хоятэв, верӆы омасты ант верытаӆ. Ӆув ищи «чумовой капитал» кеша мосты пормасат вераӆ.
Тамащ нётапса, еӆпи туп ар няврэмаӊа ювам хоттэӆата мийӆыса. 2025-мет таӆ эӆты па кимет няврэм сэма питтыйн, маты питса. Йи пуш маты нётапса тэӆаӆ, ох щиран, ветсот щёрас моӆтас соӆкувая хойӆ.
Веӆщи тащ хота рупитты манты айӆат хоятата, щит шеӊк ям нётапса. Няӆъяӊ пеӆа вет ул юх, хот лаӊкты арат кат таӆ нюки па кат парщин лак, карты кур пиӆан кур иӆпия понты карты, хотхар сохаӆ па кат вуӆэӊ ухаӆ тохи ӆуӊтасӆат.
Там пора унты, Ямал мувев ӆоватан, ветсот пеӆа ветъяӊ хут хоттэӆ «чумовой капитал» ёша маса. 2026-мет таӆ кеша сопаса, хоӆна хольмаӊ пеӆа ӆапат хот тэӆ ӆэщатты мосаӆ. Щи воӆаӊ рупата туты вер хоща, шоши мир верантты, тус ёшаӊ хоятӆув ӆойӆат.
Зоя Куртямова ханшам потар
Авторы
Лух Авт
Темы