обновлено: 11:56, 09 ноября 2026
Лух Авт
Вуӆэӊ ёх Кев ёхӆы вуншсат
Вуӆы тащ шавиты ёх онасӆаӆ пиӆан ёхӆы пеӆа нёхӆысат. Сусэв тампуш шеӊк мелак, щишан таӆ уӆты тахаята вуӆы тащат ант тэрматыман воштыӆайт. Ванты ӆорӆаӆ, ёханӆаӆ па Асэв еӊкан хоӆна лап ант таӆсайт.
Ӆуӊ сыс вуӆы шавиты ёх, хой Кев ӆыпийн, хой Кев тум пелакан усат. Саран мув кев питаран ёлах па ям вуӆы тащ шавиты па энмаӆты. Вуӆэт яма щутщисат, яма ӆэсат па нёхеӊа йисат.
Там йис яӆап щиран вуӆэӊ ёх ӆуӊ сыс вуӆэӊ ухаӆ воӆаӊ ант кирыӆыӆат. Туп иса карты шупатан яӊхӆат. Щитӆаӆ нэм — квадроциклат. Айӆтыена кашӊ семья щимащ мутрайт тайты питсат. Щаӆта моӆтэӆ панькамтаӆ па яӆап щуӊк мосаӆ ӆуттыя. Щи карты шуп ураӊан вуӆэӊ ёх ар ох маӆат. Щи тумпийн карты шуп ивеван мосаӆ тут йиӊк войн понтыя. Тампуш тут йиӊк тынаӊа йис. Щишан сус пеӆа ёх ёш ухаӆ кирыӆыты питсат.
Касаӆты сыс хоптэт нох кирӆайт. Щи арат ӆаварт ват ухӆат квадроциклан хув таӆты ант верытӆа. Онас кар пормас ар верытаӆ туты. Щитан ям. Ин Ас потты тыӆащан вуӆэӊ ёх вуӆыӆаӆ яха акатсаӆӆаӆ, онасат каратсат па Кев вуншты щи питщасат.
Сельхозпредприятие «Мужевское» оӆаӊмет тащ оӆӊашак Кев там пелка питмеӆ. Ин Лагорта ёхан леп ӆавӆасӆат хун ищки хатӆат ёхатӆат па еӆӆы нёхтыӆэӆ. Кимет тащ ищи ёлах пиӆан, хун ёханӆаӆ еӊка потӆайт, таӆ уӆты па хорсты лотӆаӆа касаӆӆат.
Иван Сандрин ханшам потар
