Лух Авт
Вуӆэӊ ёх Кева ёхатсат
Ӆорвош па Кев сыӆ районатан уӆты вуӆэӊ ёх ун кер тыӆащ соханты хатӆатан ӆуӊ уӆты тахайӆаӆа касаӆты питсат. Ин щи Кев лепа ванамасат: хой ӆыпийн ӆойты питӆат, хой па тум пелка манӆат.
Мелак хатӆат оӆӊа Ӆорвош район хоща ёхатсат. Щишан сельскохозяйственной предприятие «Мужевское» хоща уӆты вуӆы тащат Кев пеӆа еӆпи манты актащсат. Хоты вуӆэӊ ёх верат манӆат, вуӆэт яммаӆты леккар куща ху, Алексей Озелов каматса ясаӊ ястас: «Муӊ хощаев няӆ вуӆэӊ тащ уӆ. Товийн, касаӆты еӆпийн, ӆуӊтам щиран тащӆув хоща ветӆэм щёрас вуӆы уӆ. Шоши вуӆэт пиӆан нийӆкем щёрса хойӆ. Товев яма манас па тащӆув ӆэвман усат. Суюв омасты тыӆщев сохнас, нэ вуӆэт ар пелак пошхаӊа йисат.
Оӆаӊмет тащев мет уншак, щита кушая Виталий Озелов уӆ. Ин ӆув Ун Лохорта ёханан, Кев ӆыпийн ӆойӆат. Хоӆна каматса пуш касаӆӆат па па пелка питӆат. Кимет тащев хоща Евгений Талигин кущая понман уӆ. Ӆув Кев тум пелка питсат — Омращ (Грубею) ёхан хоща ӆойӆат. Вячеслав Лонгортов хуӆмет тащ куща ху ястас — ин ӆув Юхаӊ кевн ӆойӆат, еша ронӆат па Кев ӆыпия касаӆӆат, щита ӆойты питӆат. Няӆмет тащев касаӆты юшеӆ мет нум пелак эӆты манаӆ. Щита кущая Станислав Лонгортов понман уӆ. Ӆув ищи Кев ӆыпийн ӆуӊ сыс ӆойты питӆат».
ООО «Сельскохозяйственной предприятие «Горковское» хоща ищи няӆ вуӆэӊ тащ уӆ. Щит эӆты муӊев вуӆы леккар Руслан Нева айкеӆ верас: «Муӊ тащӆув иса Кев уншсат. Карты юш леп уӆӆат. Полярный Урал нэмпи станция пуӊаӆан 1-мет па 2-мет тащат ӆойӆат. Щита Пётр Сязи па Константин Серасхов бригадирата рупитӆаӊан. Николай па Олег Максаровӊан 3-мет па 4-мет тащӆаӆ Хорота станция лепан шавиӆӆаӆ. Ин каӆаӊӆув ӆэӆат па щутщиӆат».
Ущ тыӆащ кутап хатӆат кеша вуӆы леккарат Кев пеӆа манӆат. Кашӊ вуӆы тащ ӆувиӆаӆ ванттыя па ӆуӊаттыя мосаӆ. Щит эӆты ныты питӆа, хоты товеӆ манас па муй арат суюв сэма питас.
Иван Сандрин ханшам потар
Авторы
Лух Авт
Темы