Лух Авт
Вуӆэӊ па вой-хуӆ веӆпас ёх актащисат
Хащам ятан Русскинской куртан Сурханӆ районан «Вуӆэӊ па вой-хуӆ веӆпас ёх» емаӊ хатӆ манас. Щимащ воӆаӊ вер ям хуван ӆэщатса. Кашӊ таӆ рут щирн ӆуӊтасты муватн хантэт ияха ёхтыӆыӆат, уйтантыӆат, ӆыв кутэӆн ар айкеӆ оша паятӆат, потрэмаӆат, муй верат туса верӆат, арсыр касапсэт ӆыв кутэӆн ӆэщатӆат па вуӆыйн кирам ухӆатн касӆат.
Тампуш Русскинской куртэв кутопн ямкем ар хатнэху арпелак эваӆт ияха актащас. Хантэт тый емаӊ хатӆэӆ постаты ёхатсат, щаӆта па сыр-сыр мират эваӆт уӆты хуйт-нэӊат щимащ умащ па хорамаӊ вуӆыйн кирам ухӆатн яӊхты касапсэт па там емаӊ хатӆ ванттыя иса арпелак вошат па куртат эваӆт ищиты тамхатӆ тый ёхтыӆысат.
Емаӊ хатӆэв туты хоятат айӆат ханты хуйт-нэӊат арсыр касты щирата хущиӆысат. Щи отат кутн щимащ касапсэт усат: тынщаӊ сува ёваӆматыя, ухӆат шоппи наварматыя, катӆасыты муй вуӆыйн кирам ухӆатн касты верат. Иса нийӆ щёс вуш эваӆт па хатӆ кутоп унты ху ёхат муй нэӊат ӆыв кутэӆн вуӆыйн кирам ухӆатн навраӆтысат. Тампуш щи касапсэта араттэӆн 35 вуӆэӊ ухаӆ япсыена ӆэщатсат. Касты харн ма касапсэт туӊа-щира па туса артаӆаты хатнэху Зинур Айнуллин пиӆан уйтантысам. Ӆувеӆ инщассэм, хоты там кутатн хантэт кассат. Ӆув па тамиты щи нюхмас, матты касапсайн уӆам ханты хуйт па нэӊат вуӆыӆаӆ шеӊк яма тампуш хухаӆсат. Туп шеӊк ар хатнэху онтасан, итухаӆ вуӆэт шеӊк пакнаптысайт па щи патыйн юш эваӆт ёвра мантсат.
Щаӆта тата тынасты-ӆутасты хар ханты ёхӆув-нэӊӆув Русскинской курт хоща пуншиӆысат. Щита вуӆы, кураӊ вой, лук нёхи ӆутты рахас. Щаӆта потам сортат, ев, мевты, щапар, сархат веӆпасӆаты хоятатн яма тынысайт. Шеӊк ар арсыр вонщамот мощатты верытса. Мойӊ хоятат шеӊк ар вуӆы нёхи тата ӆутсат.
Вуӆэӊ ухӆатн касман, ёхат кутан мет оӆӊа Леонид Комтин ёхтас, нэӊат кутан — Олеся Тэвлина. Ӆыв мет ун мойӆапса хоӆамсаӊан — щит «Буран» нэмпи тутаӊ ухаӆ. Кашӊ хоята маса. Кимет па хуӆмет — Андрей Сопочин па Денис Комтин усӊан.
Нэӊат кутан кимет муй хуӆмет тахет Анастасия Комтина па Ида Сопочина тампуш мощатсаӊан. Ӆыв ищиты арсыр тынаӊ мойӆапсаятн ун куща ёхӆувн юкантсайт. Шеӊк яма там тови мелак хатаӆн, ищи куромн Русскинской куртан ханты ёхӆув емаӊ хатӆ манас.
Владимир Енов ханшам потар
Авторы
Лух Авт
Темы