Лух Авт
Вуӆэт муш эӆты портунан понӆайт
Округеван ай кер тыӆась эӆты вуӆэт сибирской язва муш эӆты портунан понты питсайт. Ин рупатайт Ямальской, Приуральской, Тазовской, Надымской па Пуровской районатан манӆат. Там хатӆа ветъяң пеӆа кат сёрс вуӆы портунаң уколан версайт.
Там таӆан 545 сёрс вуӆы уколан понты утсиӆайт. Укол понты тумпийн, вуӆэт хоӆна вурэӆ уӆа. Тащан уӆты ампат иси уколан понӆайт па порты войт эӆты портунан нёсытӆайт. Си рупата ураңан вуӆы тащан яңхты хоятата ох сохаптаты ант мосаӆ.
Мосты порайн симась рупатайт манты тахая кашң таӆ аршак вуӆы тутӆыты питса. Хасям таӆан 539 сёрс вуӆы уколан версайт па FRID-посан понты питсайт. Симась пормас хуват рупата сорашак манаӆ.
Товийн вуӆы тащат куртат пуңаӆан уӆӆат. Си порайн колледжан ветеринара утаӆтыты няврэмат практика маты верытӆат. Энамты няврэмат вуӆы тасян яңхты хоятата коралят ӆонсьты нётӆат, мосты нэпекат ӆэсятӆат, войт посан па портунан понӆат.
ГБУ «Окружной центр ветеринарии» Ӆорвош отделан вуӆы леккара рупитты пох Вячеслав Сандрин каматса ясаң ястас: «Ай кер тыӆась хасям хатӆатан муң МСП «Мужевский» совхоз пеӆа ӆуңтасты няӆмет бригадайн рупитсув. Совхоз па шоши ёх таща ӆуңтасты кат сёрс вуӆы портунан понтсув па биркайн версув. Ешауӆ суюват сэма питты порая йиӆ. Сишан рупатаев туп ущ тыӆасян яңмет хатӆ эӆты хольмаң хатӆ унты туӆэв, кимет, хуӆмет па ветмет бригадаята яңхӆув, вертолётан туӆаюв.
Оӆаң хота Ӆапатнаңк вош эӆты карты юш хуват яңхты хопан манӆув. Си бригадайт МСП «Мужевский» совхоза ӆуңтасӆат. Муң хуӆам ху рупитӆув. Итаӆ портун понаӆ, кимет — бирка вераӆ, хуӆмет — нэпекат ӆэсятаӆ. Си порайн хоӆна «Горковской» совхоза ӆуңтасты оӆаңмет, кимет, хуӆмет па няӆмет тащатан рупитты питӆув».
Альбина Тырлина ханшам потар
Авторы
Лух Авт
Темы