Лух Авт
Вуӆы нёхи сопасӆаты пора еӆӆы манаӆ
Округев хуват вуӆы нёхи сопасӆаты пора еӆӆы манаӆ. Ӆорвош районан МСП «Мужевское» хонна хорсащаӆ. Там таӆан арпелак, ӆув ёра вуӆы тайты хоятат нёхи маӆат.
Товийн Ӆорвош районан ветсот вуӆы маты ураӊан договор нэпек ӆэсятман ус. Совхоз вуӆэт тампуш хорты ант питӆайт, шавиӆайт. Кат таӆ сыс тащеӆ 5 340 вуӆы эӆты 7 500 унты энмаӆты вутсиӆэӆ. Си ураӊан хор вуӆэт мосмитӆат. Номас версат «Байдарацкой» совхозан няӆъяӊ хор ӆутты.
Вуӆы хорты порайӆ Мужийн ван хатӆап тыӆась хольмаӊмет хатӆ унты манаӆ. Ияха ӆуӊатман няӆъяӊ пеӆа нийӆ тонна нёхи ӆэсятты вутсиӆат. «Горковской» совхоз хасям таӆ унты па няӆъяӊ пеӆа хуӆам тонна нёхи ӆэсятаӆ. Ин хорсащты тахайн яртъяӊ хоят рупитаӆ. Ӆув кутэӆан кат вуӆы леккар.
Там мосванан Ӆорвош район администрация вуӆы нёхи понты вакуумной упаковщик ӆутас. Симась хошапан нёхи хувшак па ямашак шаващаӆ.
«Тампуш Мужевской сельхозпредприятие эӆты мет оӆӊа кимет бригада вуӆы хорты тахая нийӆъяӊкем вуӆы воштас. Си тащан бригадира Евгений Анатольевич Талигин рупитаӆ. Хасям ӆапатан кат хатӆ сыс вуӆыӆаӆ хорсаӆӆаӆ.
Там ӆапат етшаты унты оӆаӊмет бригадайн кусяя уӆты ху Виталий Николаевич Озелов ёхатаӆ. Ин ӆув вуӆыӆаӆ кораля воштасӆаӆ. Сита пирыӆат, муй войӆаӆ хорты, хойтыӆаӆ хайты. Ӆув тащеӆ мет хуван уӆ, Варчато ӆор Танья ёхан пеӆа. Катсот вуӆы нёхия маты вутсиӆат.
Округ па Ӆорвош район постам хатӆа, округ куся тащан яӊхты хоттэӆата мойӆапсайт ӆэсятас. Ӆув кутэӆан Виталий Николаевич Озелов ус, «Буран» ӆонщхопан мойӆаса.
Мет юхат, Вячеслав Антонович Лонгортов няӆмет тащ эӆты вуӆыӆаӆ воштаӆӆы. Ӆув катсот пеӆа ветъяӊ вуӆы маты ӆэсятаӆ. Хусмет хатӆ юпийн ёхатӆат.
Питӆор эӆты Виктор Александрович Сязи ёхтыӆыйс. Пенсияйн уӆ. Си еӆпийн Питӆор тащатан вуӆы леккара рупитас. Ӆув ясӊаӆ эӆты, куртэӆ пуӊаӆан кат тащан уӆты вуӆэт хорсайт. Сита хоӆна Мохсар ёх йи тащ хасяс. Вуӆыӆаӆ хоӆна воштаӆӆаӆ.
Мужевской совхозан ӆэсятты нёхи мет оӆӊа ашкуӆаята, леккар хотата па ай няврэмат яӊхты тахаята туӆайт. Хасям отӆаӆ куртаӊ хоятата тыныӆайт», — Ӆорвош район шоши мир ёх па сельской хозяйство верат туты воӆаӊ специалист Иван Эдуардович Сандрин ясаӊ верас.
Альбина Тырлина ханшам потар
Авторы
Лух Авт
Темы