Лух Авт
«Ӆыӆаӊ уӆапса щират» фестиваля пиӆтащияты
Там каш верты па тынасты уйтантопса кашӊ таӆ сус порайн Ӆорвош районан верыӆыӆа. Тампуш щёхар тыӆащ 12-мет хатаӆан питаӆ. Кашӊ курт эӆты Мужи воша хоттэӆ хоятат ёхтыӆыӆат, рутӆаӆ-ӆухасӆаӆ пиӆан уйтантыӆат. Уйтты па хошты верӆаӆ мира этаӆтыӆат.
Нын па «Живые традиции» фестиваля ёхтыӆыяты. Хой муй ӆуӊ сыс ӆэщатас: хуӆ вой, шумах, соӆаӊ хуӆ, вонщамот, толах па арсыр ӆэвпас. Ёра щиран рупитты хоятат, хой мис йиӊк, щищкурэк пошах, нёхи ӆэщатӆат, иса верытӆат тынасты хара тутӆыты. Щи кеша мосаӆ щёхар тыӆащ 5-мет хатӆ унты Ӆорвош район управление экономики хоща ёхтыӆыты па заявка ханшты.
Хой ёхатты кум ант шитаӆ, верытӆат там электронной почта хуват заявка китты: ekonom@shur.yanao.ru. Моӆты инщасты вер тайӆаты ки, там телефон хуват потартаты: 8 (34994) 22365.
Ямал мувев ӆоватан тынасты-пелтащты вер хув пора эӆты манаӆ. Щи порайн Мужи вош ай куртые ус, хотӆаӆ веӆщи этты питсат. Ванты, нумаӆта, Тобольск па Сумат вошат эӆты Ай Ас хуват тынасты тутаӊ хопат Пулӊават пеӆа яӊхиӆысат. Манты юшеӆ хуват Мужи вош каӆнаӊан щутщаты ӆойӆысат, щи кут хоятат мосты пормасат ӆув эӆтыӆаӆ ӆутыӆысат. Айнайн каӆнаӊ тынасты хар уна йиты питас. Шоши ёх шай, саккар, ӆат, шар, щашкан па сак сахат вой сох, вуӆы нёхи, хуӆ, ӆытап па арсыр вонщамот пелтыӆысат. Щиты сус пора эӆты Ас потты унты тынассат. Кашӊ таӆ аршак тынасты-ӆутасты хоятат яха актащиты питсат. Катра нэпекатан ханшман уӆ: «1850-мет таӆан, Мужи курт тынасты харан тыныйм пормасат 2710 щёрас соӆкувая хоймеӆ. Щи таӆатан Ирбитской ярмарка мет ун тынасты хара уӆмаӆ, ӆув тыныйv пормасӆаӆ 75 щёрас моӆтас соӆкувая ёхатмеӆ». 1917-мет таӆ революция юпийн щи верат шитама ювантысат.
Еӆӆы па яӆап щиран 1942-мет таӆан щимащ вер уӆӆыйс. Щи порайн Ӆорвош район ӆоватан уӆты яӊ моӆтас колхозат ӆэщатам па энмаӆтам ӆэтотӆаӆ алиӆысӆаӆ. Щи тумпийн аӆ хоятат ищи тохи пиӆтащисат. Катра порайн воӆаӊ ох антом ус, щишан хоятат ӆэщатам ӆэтотӆаӆ па пормасӆаӆ пиӆан пелтащисат.
Хуӆамхощъяӊ таӆ хащаман, 2013-мет таӆан «Ас тынасты хар» мет оӆаӊ пуш ӆарпитса. Ӆувел пуншты Дмитрий Кобылкин ёхтыӆыйс. Аратаӆ, щи порайн Ямал мувев ӆоват эӆты 40 моӆтас тынасты хоттэӆат актащисат. Па муват эӆты тынасты ёх ищи усат.
Щиты «Ас тынасты хар» яӊ таӆ нэматса, 2023-мет таӆ эӆты «Ӆыӆаӊ уӆапса щират» нэман понтса, рущ щиран — «Живые традиции». Щишан, ӆэщатыяты, актащияты па щи фестиваля яӊхаты.
Иван Сандрин ханшам айкеӆ
Авторы
Лух Авт
Темы