Лух Авт
Закон нэпек ӆэщатты ёх
Там ӆапатан Хон мувев ӆоват арсыр регионат эӆты ошаӊ па нумасты хоятат Пулӊават вошан актащисат. Ямал мувев Законодательной Собрание хоща «Диалог парламентариев» нэмпи форум ӆарпиӆыса.
Тампуш Россия хон мувев ӆоватан 120 таӆ постаӆа, хоты мет оӆаӊ нэпека понам законат этты питсат. Российской империя 1906-мет таӆн ун кер тыӆащ 27-мет хатаӆн мет оӆаӊ Государственной Дума пуншса. Щи хатӆ эӆты Российской парламентаризм таӆ-ӆуӊат ӆуӊатты питсайт.
Там емаӊ хатӆ кеша Тюменской, Челябинской, Свердловской па Волгоградской область, Ёмвош па Красноярской край муват, Карелия, Саха (Якутия) па Донецкой Народной Республикайт эӆты законат ӆэщатты щира рупитты ёх ёхтыӆысат. Ӆув потарсат па альсат, хоты ӆув мувӆаӆан шоши хоятӆаӆ кеша уӆапса кенашак верты ураӊна, хув номпсаӊ ошаӊ ясӊат нэпека понӆат.
Уйтантопса хоща арсыр уӆапса верат эӆты потар манас: хоты мосаӆ еӊкаӊ муван ар ятпи уӆты хотат омасты, яӆап яӊхты юшат туӊа-щира верты, ищки кутан нампар йи лота акатты па Воӆаӊ ляль порайн рупитам хоятат кеша емаӊ хатӆ постаты унты.
Муӊ шоши хоятӆув мет такан хуӆантсат хоты сахат па муватан шимӆаӊ рут мир хоятат кеша ханшам законат онтас верӆат. Кашӊ Овс мув сыӆн, хота шимӆаӊ рут мир хоятат уӆӆат — мув иӆпийн мув шув, мув тут йиӊк па сорнет уӆӆат. Щи тынаӊ отат нох караӆаты ураӊна арсыр тахайт эӆты ун нефтегазовой компанияйт этсат па рупитты ёхӆаӆ пелтащиман ёхтыӆыӆат. Хоты сахат шоши хоятӆува йи номас понман щимащ ёхтам хоятат пиӆан уӆты, потрэмиты па муй верты. Щи эӆты потар манас:
– Мет такан Россия мувев Закон № 2395-1 «О недрах» эӆты потарса — хун промышленной компанияйт мув эӆты тынаӊ сорнет па мув шуват нох ёхатӆат, щи ураӊна ӆув шоши хоятӆув уӆапса кеша нётап ат верӆат;
– Закон № 82-ФЗ «О гарантиях прав коренных малочисленных народов РФ» ищи еша туӊмаӆты мосаӆ — мув сорнет нох караӆыты еӆпийн мосаӆ этнологической экспертиза верты. Щи щиран ныты питӆа рахаӆ ки мув нох хырты, хоты сахат шимӆаӊ мир хоятат еӆӆы уӆты питӆат;
– Шоши шимӆаӊ рут мир ясӊат кеша мосаӆ ун онтас верты. Энамты па айӆат ёх, хой рут ясаӊӆаӆ еӆӆы туты вуратӆат, проектат щиран нётты.
Хоты Ёмвошн хантэт па охалят уӆӆат Еремей Айпин айкеӆ верас. Хоӆна ар потарса хоты сахат мосаӆ уӆапсаев кенашак па ямашак верты. Щи ураӊна шоши хоятӆува ищи мосаӆ кущайт пеӆа ещаӆ манты, ант паӆты па мосты верат эӆты потарты. Хун уӆапсаен яммаӆты вутщиӆэн щит эӆты еӆамты ант мосаӆ.
Якутия мув эӆты Константин Роббек па Красноярской край эӆты Григорий Дюкарев ёхтыӆысат. Ӆув мувӆаӆан шоши хоятӆаӆ кеша ун онтас верӆат па нэпек щиран нётӆат. Хоты ӆув ястаӆат, Ямал мувеван уӆты шимӆаӊ рут мир хоятӆув кеша ищи мосаӆ онтас верты па нётты хоят. Муӊ нумастэван ешауӆ муӊ хощаев ищи щимащ хоят этаӆ.
Иван Сандрин ханшам потар
Авторы
Лух Авт
Темы