Няръяна Ӈэрм
Ӈаябадмʼ ватаваʼ няюʼ
Тюку илаӈгананаˮ тэри ватаӈгованзь нин ханатˮ. Ӈэрмʼ теранʼ ӈэбат ӈаябаданʼ харвабат тикыʼ няюʼ таславы падро нюртеˮэʼ сертаба тараӈгуˮ. Тикысипойˮ сит няˮамбатоʼ ӈока есямʼ салдамба таслаӈгуˮ. Тарця яӈговаʼ еˮэмня ӈэрмʼ терӈэ еˮэмнянаˮ ӈадимдевы падарˮ таняˮ, тикыˮ ӈахакуд сертабадаˮ.
Ӈани похона ватаӈгованʼ харванаˮ ненэцяˮ тедаʼ ӈахакуд падродоʼ маˮламбабатоʼ тара. Падро вэбаʼ ирыʼ нюртей яляʼ ӈэсондʼ няˮмарпидоʼ: Салехардахана — ты пэртиˮ, халяданиˮ серо минрена департаментхана, районхана — ӈэрмʼ терˮ серо тидхалембада управленияхана.
Ӈани похона едэй ватоʼ саирˮмана ӈэрмʼ терˮ халядавандоʼ няюʼ падро ниˮ падыбаӈгуˮ. Тарцямʼ тюку поʼ ӈадимдедонзь, таремʼ сяниˮ ваˮлер нёда ни тараӈгуˮ. Ӈопой ватодоʼ 2027 похона манзаралтыˮ. Тарцямʼ няˮамваʼ няюʼ ФАДНанʼ пыхыдадоʼ падвы ӈэбатоʼ тара. Тикарихина таӈга пиртадоʼ.
Тюку юн ӈадивоˮмахад округнаˮ ӈэвахана мэнамʼ Ямалнаˮ тиӈгывна ӈэдалёрˮманда мальӈгана Тарко-Саля маркана халядаваʼ нямна хонрамбавэдонзь. Маˮнимˮ, халямʼ хадаваʼ няюʼ падро мипавандоʼ ёльцяӈгана ӈысмаʼ тэнзмʼ мэтаˮ ӈэрмʼ терӈэ ниˮ толюˮ. Ӈамгэ тарця ӈэбата? Россиянаˮ ӈарка ватоʼ серʼ ӈысмаˮ тянё тэнзмʼ мэтаӈэ ниˮ толюˮ. Округхананаˮ ӈэрмʼ терӈэ ненэй ненэцяˮ, хабиˮ, тасуʼ хабиˮ толыˮ. Пыдоʼ еˮэмняриндоʼ тарця ватоˮ манзараˮ. Толырˮманандоʼ тянё ӈэрмʼ терӈэ толёвы ӈэбатоʼ ӈаниʼ таремʼ таӈга хане пиртадонзь.
Марина Яройʼ падвы
Сидяӈг: М.Ярʼ тадтавы
Авторы
Няръяна Нгэрм
Темы