Няръяна Ӈэрм
Ӈаԓка форумʼ ӈайты
Пимшатаˮ, дямаланаˮ ӈашки нешаˮ «Российский Север» нимита форуман ӈанатадят. Чики мероприятииʼ ӈаԓкадюм маԓкомш диԓихина мэтӈатуӈ. Чуки похона четʼ дяԓяӈ 18 — 21 ноябрьхана Новый Уренгойхана ӈайты. Нэԓмʼ дяхана диԓинаˮ, Сибирьхана, Дальнийʼ Востокхана диԓинаˮ ӈашки нешайˮ дет тонԓюта форумʼ. Ӈопшеԓ дюԓ нешаӈ Российскийʼ Северан ӈомтыˮ.
Четдяӈкня похотатуӈ — няхаԓдюˮ хампԓяӈк потуӈ ӈӭйта ӈашки неша форуман тутыˮ. Четаӈ таньняӈ кӭймян хаʼтаˮ манԓе патԓотуӈ ӈайтаптампюԓайтуӈ. Кимя форуман кӭймян хаʼӈа заявкетуӈ 18 сентябрь дёԓьшат ӈайтаптаматуӈ таԓа платформамна Росмолодежь.Форумы. Чики мероприятииʼ ӈаԓтанаˮ ӈашкиˮ дет ӈайта национальный проектʼмана «Молодежь и дети» минты. Таԓьша форумʼ ӈаԓтана ӈашкехенаˮ деԓьше хома.
Чуки похона «Российскийʼ Север» ӈай вильты. Ӈашки нешаˮ куԓкаԓиˮ хома шеԓуˮ таньняна намтныˮ, ӈука ӈамым манытыˮ. Тохотаныˮ, ныптаконыˮ. Чикиӈ камна форуман томэˮ шеԓтамайтуӈ проектуӈ Росмолодежь конкурсхана ӈычимченыˮ. Чуки похона шитчетʼдяӈкня номинацииˮ. Грантʼ дет ӈайта вештоӈ ӈуп миллионʼ ӈок. Грантʼ дет ӈайта конкурсхана мянаԓман хаʼтаˮ 1 октябрь дёԓьшат таньдет ӈайта патԓотоӈ ӈайтаптаматуӈ таԓаˮ.
Чикиӈ камна форуман томыˮ ӈашкӭэˮ наӈича дяхат мэнаˮ нетунˮ конӈаˮ, нятуӈ шеԓтамыˮ проектуˮ манытаӈаˮ. Детэхе диԓютатуӈ конӈаˮ. Маняˮ Пуровскийʼ районхана диԓинаˮ ӈашкиˮ форуман ӈупчики ӈанатадят. Кукитоӈ патмайтуӈ проектуӈ таняна ӈычимченыˮ. Ӈэԓмʼ дяхана диԓинаˮ, Сибирьхана, Дальнийʼ Востокхана мэнаˮ ӈашки нешайˮ дет тонԓюта форумʼ 2015 похой шеԓтамы. Таӈок поˮ дямпан Российскийʼ Северʼхана ӈука тэмс нешаˮ мэӈашˮ.
Андрей Пяк патмы
Таттама: Андрей Пяк таттамы
Авторы
Няръяна Нгэрм
Темы