Няръяна Ӈэрм
Ӈанохана миньш ԓэтԓёты
Вентсамы дяха выӈита ӈука. Меԓьшата ха’та нумкна кампа» минашту». Таԓям ӈанохана миньш тоса», ԓэтԓё таԓа. Куняԓиӈ кайна нешиӈ ӈанон ӈамтманта неԓьня хомана ԓэтԓанай.
Шай’ԓимна ӈанум мэмам чедимяп’та ӈотнаӈ, ви”имня ӈанохана минта нешиӈ пон тосаны. Ӈанон ӈамтуташ ви’кня катнана паным — спасательный’ жилет’ шеԓнаӈа. Ӈанохананта ӈамчута» нета» чупей таԓьша паны» мэ’матуӈ таԓа. Четаӈ маня» Ямалханана Ӈэԓм’ чеԓ» нешаӈк таԓьша шетшата», ви’кня катнана паныдю» мичиԓпи». Округханана ӈопшеԓ дёнаԓкат ва’та хампԓяӈк дюԓ» спасательный’ жилету» тэмтамай».
Ви’кня ӈанум мэш мансԓанна», ӈанохана дятыԓта» неша» маньԓе катнана паныдю» нямаԓпи». Пюԓ дяханана ӈупчики чуувна диԓина», мансԓанна нешади» панэт таԓьша шетшата жилету» тэмтамай». Ӈэԓм’ чеԓ» нешай» дет ӈайта управленихит спасательный’ жилету» мичиԓпи». Кимя таԓьша паным ня’аммаӈ дет патаԓ патса, таньнят ня’амнаӈата. Куки» неша» таԓьшаха спасательный’ панытатуӈ маньԓе ня’амӈаш». Чейня таӈичохона ӈану» мэ’та» неша» ӈокамшту».
Каԓитана» дёԓиԓпатоӈ пон викня мэ’шту». Дяшитуӈ дёмпёшь, нямсахайтуӈ ӈытыпёшь, ваттапёшь, каԓитуӈ тайвапёшь — ӈанум мэш мансԓашту». Выӈин тэвманта тайхана, куняԓиӈ ӈанохана кӭйна нешиӈ шетшата, ви’кня каткана спасательный’ паным шеԓмата хома. Вентсамы, кампта» ха’та дяхахана выӈи ӈука: ӈанохана минта нешиӈ пям дятаны, кысуй нимня кӭйны. Таԓям таԓьша спасательный’ паны ӈанохана дятыԓта нешаӈкна ӈаԓкамана таԓа.
Лариса Айваседо патмы
Авторы
Няръяна Нгэрм
Темы