обновлено: 07:52, 08 сентября 2025
Няръяна Ӈэрм
Ӈарка яʼ няӈы юрёсаваˮ
«Няръяна Ӈэрм» газетанаˮ юне падаркана падыбаванаˮ хавна тамна едэй мутры нядˮмяць ВКонтакте, Одноклассники нюбетаˮ социальной сетьхана падыбасетынаˮ. Таняна толаӈгодинаˮ ӈаниʼ танясетыˮ. Таймырʼ, Ӈарка яʼ, Ямалʼ няна иленаˮ ненэй ненэцяˮ ӈобтʼ тэвортаˮ тоˮолхаˮ ӈэсетыˮ, нитоʼ илаʼ нямна теневасетыˮ. Ханяӈэхэна едэй юрёсадваˮ таняд хосетываˮ.
Таремʼ Ӈарка яхана илена Пырирко Матрёна Ивановнамʼ торомдаваць. Сяхаринда нянаˮ пилиˮ сававна паднасеты. Сиднаˮ манзаяхананаˮ савуцеты. Вадида етриʼ явнандо ӈэсетыˮ. Ӈобаӈгуна нянда паднаˮ идейваць. Иланда нямна хонрамбиваць. Вадеˮмыда тедаʼ толаӈгодаӈэ еˮэмнандаˮ падыбинаˮ. Ӈобкана сава няваˮ торомдахаваˮ.
— Еркарами — Талеева (хасаванʼ тэнз), харˮн тэнзкоцяв — Пырерко, нисянʼ нюмʼ — Иван (Ванеясь), ӈадьбянда нисянʼ нюмгана Ивановнадмʼ. Хасаванʼ яӈгуˮмахад, не нюнʼ хэвхана иледмʼ. Не нюкцяда тюку поʼ 6 классахана тохолкода. Ӈарка нюда — палытана, мята тер няць ӈаниʼ маркана иле. Невхэхэна тарасетыдмʼ, хыноць теневадмʼ. Хаданʼ, небянʼ сё мэцетыдмʼ.
Мань тохолкодадмʼ (ӈацекы тохоламбададмʼ). Тюку поʼ едэй программмавна 4, 5, 6 классхаˮна манзаравандадмʼ. Илеваʼ ямбанʼ евако ӈацекы тохоламбидмʼ. Ӈадьбятоʼ ненэй вадамʼ ехэрадоʼ. Сертаванда манзаиниˮ харˮн тасламбин, поʼ серʼ тярпин. Ямалʼ нянаНяруй Валентина Нёлёковнамʼ няби Ядне Нина Николаевнамʼ сававна теневадмʼ. Округханаˮ Елена Тимофеевна Пушкарева, Татьяна Лар турӈаханзь. Сяхаӈгавʼ ӈопой ненадо конкрессанʼ нэдалерӈадамзь, таняна Лапсуй Анастасия Тимофеевнамʼ ходамзь. Сусой Елена Григорьевнамʼ ӈаниʼ теневавась, невхэхэна яханаˮ турӈась. Тамна ненэцяˮ вадавна паднадмʼ, тадриʼ сборникув ӈадимда. Ӈока съездхаˮна, конгрессхаˮна, семинаркаˮна теневабцуни ӈадимдембасетыдмʼ. Нюртей мэваʼ Ямаланʼ 1972 похона тохолкодаˮ (ӈацекы тохоламбадиˮ) курсхана мэванзь турӈадамзь, округхаднаˮ товыˮ юˮ тохолкодась. Клубхана тараваць. Илниʼ ямбанʼ тикы сермʼ ёльце харвабтав. Илебей ӈэваниʼ мальӈгана самляӈг поʼ ямбанʼ «Илебц» театрхана мэдамзь.
Матрёна Ивановна Ӈарка яʼ выʼ тер. Выӈгы иламда таремʼ тензебтембида:
— Нисяваˮ бригадирӈэ манзарась. Мяˮмаˮ ӈаркась. Ӈэсыхынанаˮ няхарˮ мяˮмаць. Нисянʼ тыда ӈокаць. Саць ябда илеваць. Мань сиˮми Лукерья хадами табедамбасеты. Ӈобкана мядоˮмана ӈэдалерцетыниʼ, хабтхаˮна есетыниʼ, ӈамдалкосетыниʼ. Халямʼ рюжахана хадабасетыниʼ. Пыда ӈысмаˮ вадамʼ сававна теневась. Хасаванʼ ня нюдя ӈэваниʼ мальӈгана ӈопой ӈэсыхына иленинзь. Мятоʼ терˮ ӈаниʼ ӈокаць. Хадаваˮ пилиˮ мякандоʼ тюӈгасеты. Выӈгана хадав сахарамбидонзь, вэвако хибяриˮ няданда пинсетыˮ. Ириваˮ тэта ӈэванаˮ еˮэмня сярвэдонзь. Тынаˮ, сава ӈамгэринаˮ, малʼ марˮмыдонзь, хибярихиˮ миˮмыдонзь. Хадаваˮ ярцеты. Ириваˮ пуняʼ хануйӈэ тось. «Харп» нюбета сярдиˮ хардахана мэвысь. Вадавнанда, техэˮ похоˮна ӈока сававна иленя ненэцяˮ няръяна луцаˮ ӈудахат маямʼ ховыць. Мале ӈарˮмы ненэцяӈэ ӈобаӈгуна еся ханхана тикы ӈэсыʼ хэвувна ӈэдалыдамзь. Ихинани ӈулиˮ пилкабтада харад.
Матрёна Ивановна тедаʼ тамна манзара, манзаямда мэнеда. Няръяна Маркана иле. Ихинанда Ямал яваˮ ӈулиˮ савуˮӈада, масиˮ сяхариʼ мядоманзь тута: «Анна Павловна Неркагиʼ школанʼ тэворманʼ харвадмʼ. Ханзерˮ манзаравадоʼ нянани ёльце илека». Пыда Ӈарка яʼ няна ёльце юнета, иӈудота не. Маняˮ еˮэмнанда сейхад миндаˮвади ӈэдарамбиваˮ. Салехарданʼ тэвбата, сита ӈатеӈгуваˮ, редакцияхананаˮ мядолабтамбаӈгуваˮ.
Галина Окотэттоʼ падвы
Сидяӈгˮ: Матрёна Пыреркоʼ ӈэдабтавыˮ
Сидяӈг: Марина Ярʼ тадтавы
