Няръяна Ӈэрм
Ӈарка соя’’ма’ яляда ӈась
Ненэй ненэцяӈэ поӈганана’’ саць юнета нява’’ таня. Хэ’’ли’ хумбанзяда вадам’ мэта ни ӈа’’. Тарабата хэтуванда вадада хэ’ тудрев’ падар’ ни’ ха’’морцеты. Пыда Анна Павловна Неркаги. Я’ ханярина паднана неӈэ теневадо’, харе’’ помнана’’ ненэй ненэця’ нява’’.
Хэвы си’’ив яляхана Анна Павловна Неркаги си’’ив ю’’ самляӈг помда ядабтась. Тикы яля’ мяканда хуркари’’ ненэця’’ турӈаць. Ханя, иланда’ ямбан’ сертавэда, сертабадада толава’ техэ. Пили’’ нюрте’’э’ падвэвнанда торомдаваць. Тикыда маня’’ ненэй ненэцяӈэ нямнана’’ ӈа’’. Сяхаринда ӈод’’ Анна Павловна’ падвы’’ ӈэрм’ тер’’ ила’ саирм’ техэ яхандо’ тэврамбидо’. Хусувэй вадада падарт’ мэёвна ха’’морӈа. Падвэвнанда кином’ сертабиць. Школахана тохолкурта’’ падвыда тохоламбидо’. Тикыда ненэй ненэцие’’ ила’ нямна ӈа’’. Сидта тет яӈорэй’ Нобелевской премиян’ тидхалембиць. Падвыда юкад вата самляӈг вадан’ тэврамбидонзь.
Анна Павловна Лаборовой’ няна иле. Таняна ӈацекыда тохоламби, яля’ ня’ табедамбида. Иландо’ саирм’ нивандо’ юрвандо’ е’’эмня харто’ ӈэсыдо’ таня. «Земля надежды» нюбе’’ӈа, таняд ӈока хибя иландамда хось.
Нянда хуркари’’ ерв’’ мядо’’манзь турцеты’’. 2015 похона ӈэсыхындо’ Патриарх Кирилл тэворӈась. 2021 похона округна’’ ӈэвахана мэна ервава’’ «За заслуги перед Ямалом» нювм’ ми’’ӈась.
Маня’’, ненэй ненэцие’’ редакция’ терӈэ нябакона’’, неяна’’ ед’ сейхад ӈэда’’ вади ӈэдарамбива’’. Иланда сенз ӈэя. Тамна пон’ падвэхэната сидна’’ майбтамбая, хэвхананда тидхалембада ӈацекыта вабц’’ пили’’ соя’’.
Автор: Марина Яр’ падвы
Авторы
Няръяна Нгэрм
Темы