Няръяна Ӈэрм
Ӈашкиуди” падеԓьш мансԓаӈа
Чуки диԓиӈ шича’ дю» шеӭв дяԓяхана ӈашки» падеԓьш мансԓанни» дяԓя. Пуровский’ районхана ӈайта школа — интернатхана», садикхана» ӈука неша ни» воспитательӈэ мансԓаӈа». Пы’тоӈ ӈашкиуде» хомана, каԓи» нютԓям падеԓьчтутуӈ.
Мария Владимировна Музафарова (Пяк) Таԓкахай школа-интернатхана шичадю» шича пуӈ мансԓаӈа. Пы’та воспитатель’ӈэ мэӈа, нюча ӈашкиуди» интернат’ садикхана падиԓя. Ӈашкиудета» каԓи» нютԓям хумудята. Группахананта шичадю”кат ӈука ӈашкиуди», ӈукадёмутуӈ нешай» ню». Падиԓчета» ӈашкиуде» дёԓьше пимши», дянаку». Маԓкамантуӈ тайхана группахананта мэна» ӈашкиудета» куԓкаԓи» ӈамыдю» шеԓтапё тохоԓампёштута. Садикхана мэчитуӈ мероприятихина» мэмантуӈ камна, каԓтыхина мэта» куԓкаԓи» олимпиадаха», конкурсхи» кӭшту». Таԓьша мероприятихина» «Я-исследователь», «Лучик в ладошке», «Моя родословная» ӈайвахай местаха» камаштуташ. Чикиӈ камна Мария Владимировна интернатхана мансԓанна» нета» няш «Все краски Ямала» нимита фестивальхана нэхэԓьшту, экологический турнирхана «Осенний кубок чистоты» ӈайвахай местан каамдяш. Мария Музафарова (Пяк) понанта ӈупчики выӈкна диԓимы. Немяхайта нешахайта «Верхне-Пуровский» совхозхана диланьч дямпан мансԓаӈаханьш. Шеӭв похонанта Таԓкахана ӈайта школа- интернатан тохоԓко томай. Ԓусаӈ ватам дехеԓамай, таньдёԓьшкана выӈкат тохоԓкош томы» ӈашкиуде» ԓусаӈ ватам, ԓусаӈ дилм дехеԓаштуш».
Шеӭв пота ӈайта ӈашкииуде, ԓусаӈ ватам дехеԓана, неԓьчеэй тохоԓкош томанта няна пюнԓаштомай, мякта каймян хаштомай. Шичитуӈ падиԓта воспитательтун, шичитуӈ тохоԓампюта учительтуӈ дёԓьше хомана ӈашкиуде» падеԓьштомэч’. Таԓям выӈкат томы» ӈашкиуди» меԓ ԓусан шеԓт тохоштомай». Школахана Мария хомана тохоԓкомай, дёԓьше пимшата, вивӈутута не ӈашки ӈаймай. Куԓкаԓи» кружокхана мэштомай, кынуштомай, таԓаштомай. Ӈупдяӈкня класс хитаԓамахатта Мария мансдяӈ дет тохоԓко Хаԓяӈкаԓтан каймай. Таньняна Ӈэԓм’ чеԓ» нешай» дет ӈайта педогогический’ колледжхана им. Зверева тохоԓкомай. Таԓьша мансдяӈ дет «Преподавание в начальных классах» тохотамай. Колледжта пут тохоԓкумата Таԓкахай школа-интернатханта мансԓаш томай. Неԓьчеэй интернатхана диԓина» ӈашки» падеԓьш мансԓамай, 2018 похот интернат садикхана нюча ӈашкиудехена» мансԓаӈа. Группахананта мэна» ӈашкиуде» Мария Музафарова немятаԓям падиԓдята, таԓям пы’тоӈ ши’та хашаӈоӈа».
Четаӈ чики мансдята хомана вихинта камуԓя. Нянанта мансԓанна» нета» няӈ ӈамыԓи» мансдетоӈ ӈуп вин камоԓьш шеԓташтутуӈ. Садикхана мэна» ӈашкиудета» няш куԓкаԓи» мероприятихина» мэшту», шанат конкурсхана» мянаԓьш нэхэԓьшту». Чикиӈ камна пы’та спорт’хана мянаԓьшту, куԓкаԓи» марафонхана шуԓвиԓьшту. Шичадю» шича пуӈ мансԓаманта дямпан Мария Владимировна шанат ӈашкиуди» хома шоньшахана ватаӈаш. Падеԓьштомыта нита» четаӈ кукитоӈ манԓе ӈаԓка неша». Нянанта мансԓанна» нета» маньшту», Мария Владимировна дёԓьше чиԓьний, пимшата ни. Воспитательӈэ мансԓаманта дямпан шанат мэмаӈ хома патаԓ камаштуш. Пы’та хомана мансԓаманта де’эмня веԓву» мимы» куԓкаԓи» патԓота» — грамотита», дипломута» тадя». Четаӈ нюча ӈашки» падиԓьта» воспитателю» дет ӈайта дяԓяхана Мария Владимировнам, ӈай ӈыди Ямалхана ӈайта садикхана» ӈашки» падеԓьш мансԓанни» чупей поздравийпина». Хамана диԓиӈата», нинюта» канэԓ», мансдямта хома шоньшахана» минԓеӈата».
Андрей Пяк патмы
Авторы
Няръяна Нгэрм
Темы