Няръяна Ӈэрм
Ӈацекыˮ едʼ
Сюзанна няби Мирон Сэротэттахаʼ Нядаӈгардахана илеӈахаʼ. Ӈавнанда Ямальской районʼ терхаʼ. Мядʼ терӈэ хэˮмяхадандиʼ сидя нюдиʼ соявысь. Ӈацекэхэюдиʼ вадабавандиʼ хавна хуркариˮ тарана серо ӈадимдембихиʼ. Яндиʼ терˮ нитиʼ иламʼ савумдамба нидиʼ нядабахая варемдиʼ мэˮӈахаʼ.
Тандаяʼ Сюзанна «Растём вместе» ӈацекы пэртиˮ агентствомʼ нэсь. Тюку поʼ округнаˮ ӈэвахана мэна ервхаданаˮ грантʼ есиˮ нядˮмамʼ няˮмась. Падвы проектамда «Мой бизнес» нерняʼ мэвыдась. Тамальӈгана грантʼ есиˮ нядˮмамʼ няˮмаванʼ харвавы няхарˮ юˮ сиˮив Ямалʼ тер ӈэвысь. Хартоʼ индоʼ серʼ манзаранаˮ сидя ирыʼ ямбанʼ бизнес-проект падыба тоходанвыць. Тохоламбавыдоʼ малʼ ӈацекымʼ пэрмаʼ няби маниеваʼ нямна ӈэвыць. Серодоʼ 2025 похона Ноябрьск харадʼ няна вадеˮмыдонзь. Сюзаннаʼ иʼ ядэрабцомʼ ханяʼ савуˮмэдонзь. Нянда сиˮив юрˮ ёнарˮ есямʼ миˮмыць.
Тедаʼ пявы серта мале нябимдейда. 2024 похона «Академия развития — Бум Кидс» центрмʼ нэсь. Тиканʼ туртада няхарˮ юкад вата ненэцьʼ. Нянда туртида ӈопой поход юкад вата тет поʼ ӈэсондʼ ӈаˮ. «Ӈобкана вадёданаваˮ» проектада нюртейхаданда пере. Тандаяʼ Сюзаннамʼ хонрамбидамзь. Тарця сермʼ ханзерˮ пясь таслаˮмамда вадеˮӈась:
— Мань сидя нюми. Ӈацекы вадабава нензелˮ вуни ӈаˮ. Проектмʼ пявани нерцюˮ ими ядэрӈась. Харˮн харвабцуни тидˮ таслэйнась. Ханяӈэхэна лакриʼ падрод серта тараӈгуˮ, тикахад нюд хибяхана хаевахаданд ехэраӈгун. Тикаривна нюд маниевандар яӈгуда. Ӈаниˮ ню вадабадаˮ неˮ ӈодˮ ӈаниʼ таремʼ еребермыˮ ӈэӈгуˮ. Ӈадьбята тарця сермʼ пясь идейваць. Ненэцьʼ нюмда тэри хибяринʼ миˮманʼ нида харваӈгуˮ. Пыда тохолковы, ӈацекы пэраць теневананʼ лакамбойʼ миˮманʼ харваӈгуда. Проектани серʼ юˮ ӈацекы пэртямʼ, маниенамʼ тидхалембидмʼ. Сиддоʼ тэрабавани мальӈгана яӈга табекоми яӈгусь. Неновна ӈамгэхэв едэй манзаямʼ торомдаванʼ харвавахандоʼ сырӈадамзь. Тикыʼ хавна ненэцямʼ лакриʼ няда пирˮмаʼ нямна ӈэда падро мипиваˮ.
Тохолковамдоʼ носиндалаваʼ ирыʼ малеваʼ ӈэсондʼ пэртадоʼ. Нюсавэйˮ ненэцяˮ ӈацекы маниени ӈарка пэвдей ирыхыд мякатоʼ ханзь пиртыдоʼ. Тедариʼ ялэй мэлаварихиндоʼ тэволэйдоʼ. Таняна ӈацекы сянакултамбидоʼ, едэй ӈамгэхэˮ тохоламбидоʼ. Лохокондоʼ мюня ӈацекыдоʼ нюртейˮ ензидоʼ еӈгахалбиˮ, нюртейˮ вадидоʼ хэтыбиˮ. Маниевахандоʼ небянадоʼ-нисянадоʼ таӈга манзараˮ, нютоʼ нямна ниˮ няркнаˮ, теневаˮ — нюдоʼ саваˮ ӈудахаˮ миˮядоʼ. Тюку мэлавахана манзаранаˮ ёльце саваˮ — пыдоʼ сава нярхаˮ, небярахаˮ.
Сюзаннахаʼ няби Миронхаʼ минрена «Ӈобкана вадёданаваˮ» сертиʼ нерняриʼ ӈэя, хусувэй ӈацекэхэна хареˮ мяˮлаха ӈэя, етриʼ ӈобʼ панˮӈая.
Анна Яптикʼ падвы
Авторы
Няръяна Нгэрм
Темы