Няръяна Ӈэрм
Ӈацекыˮ ембдярт тэмдаӈгу
Тюку поʼ Панаевскʼ терˮ ӈацекыˮ еˮэмня нюртей мэваʼ Сянаковаʼ ялямʼ сертаць. Хасаваˮ ӈацекыˮ сие ниць ирыхына, ӈарка нитоʼ сянаковаʼ нерцюˮ помнандоʼ пирдырӈаць.
Едэйвана ӈадимдевы ялядоʼ ӈулиˮ сававна хаясь. Нерня хардандоʼ ӈэвахана мэна ервˮ сава вади хэтаць. Тад пуна сиддоʼ маˮлавы, «День юного оленевода» проектмʼ минрена Ольга Сэротэтто лаханась.
Ӈавна Ӈытармиˮ Саляхана ӈацекыˮ еˮэмня тарця пирдырмамʼ нисетыˮ сертабюˮ, нюртей мэваʼ таремʼ ты пэртиˮ ню маˮламба пяйдоʼ. Сидя юˮ сидя хасава ӈацекыˮ варемдоʼ мэць сянакуць. Тамальӈгана хано санарпиць, яркулаць, ӈопой яхад няхарˮ мэва санарӈаць, ныхыдырӈаць. Луцаʼ ӈамгэритоʼ нимня мальцяʼ таӈга сервыць. Хаерˮ яляхана пихина мэва нянандоʼ ханяʼ савась, яӈга еˮэмняндоʼ ӈадимдевы хэбидя яляхандоʼ маймбиць.
Нямэхэна Ольга Олеговна ӈаниʼ «Уютный Ямал» проектхана мэвысь. Тандаяʼ сава юнмʼ намдаваць. Хэтвы инда ядэрабцомʼ савуˮмэдоʼ, тэравэдоʼ. Пирдырмамʼ сертаˮманда пуд таславэда: ӈацекэхэˮна мальцяˮ, таӈгаˮ тараˮ. Тедаʼ проектанда нядˮмаʼ есяд нэкалмысь. Ӈани яляхана мале ембдяро тэмда пирта. Тованда нараʼ няна нюдякоˮ сёбарˮ паской ӈамгэри мэтаˮ. Сянаковаʼ ялядоʼ тамна ненадорка ӈэӈгу. Ӈэрмʼ терˮ сянакобцˮ тэнзˮ юн ханяцей ӈарворта. Иринатоʼ пявы мэсыӈо варедоʼ мэць нерняʼ минреӈгудоʼ.
Анна Яптикʼ падвы
Авторы
Няръяна Нгэрм
Темы