Няръяна Ӈэрм
Ӈацекыˮ теневабцудоʼ манэˮмыˮ
Саляӈгардахана «Арктическая олимпиада» пэяць. Тикы тохолкодаˮ ӈацекыˮ еˮэмня сертавы пирдырма. Ӈарка классахаˮна мэнаˮ ӈэрмʼ терˮ ӈацекыˮ таняна хусувэй поʼ теневабцудоʼ ӈадимдембасетыˮ.
Мале ӈока поˮ ямбанʼ таремʼ пирдырӈаˮ. Хартоʼ яханатоʼ нитоʼ нерняʼ хаˮамвыˮ ӈацекыˮ ӈарка маркана тосетыˮ. Поӈгадандоʼ сямянхат иӈудотамдоʼ тасламба варемдоʼ мэцетыˮ. Тюку поʼ ӈаниʼ ӈобтʼ маˮлыць. Ненэй, хабиˮ, тасуʼ хабиˮ, ӈысмиˮ вадавна паднаӈгуˮ. Ямалʼ тиӈгэвна иленаˮ тодоˮ тэнзˮ ненэциеˮ илаʼ саирмʼ, невхыˮ похоˮна ӈэвыˮ серо теневавамдоʼ тасламбаӈгуˮ. Округнаˮ школахат сиддоʼ тохоламбадаˮ ӈарка нидоʼ няць товыць. Ӈокханда няхарˮ яляʼ ямбанʼ паднаӈгуˮ. Тикыʼ хавна марадʼ помна, музеянʼ ядэлаӈгудоʼ.
Нюдя пэвдей ирыʼ сидя юˮ матдомдей яляхана нюртей маˮлёвадоʼ тохолковаʼ серо минрена департаментʼ ӈарка лохоʼ мюня ӈась. Пуна Ямальской, Приуральской районхад, Тасуˮ, Ӈысмиˮ яхад товыˮ ӈацекыˮ паднаваʼ мэлвахандоʼ маˮлыць. Пякуˮ яхад, Сиˮив харв хардахад ӈэдаˮ интернетувна паднаӈгуˮ. Няндоʼ пяванда манзаидоʼ вадеˮӈаць. Ӈобˮ не ӈацекымʼ лаханако няˮӈадамзь. Ненадо пирдырмахана мэванда нямна таремʼ лаханась:
— Мань нюмами Анфиса. Еркарами Яр. Ӈэдяʼ хардахад Людмила Ивановнаʼ няʼ тонинзь. Пыда ненэй вадаваˮ тохоламба сиднаˮ нядаби. Хасаваюдимдей классахана тохолкудмʼ. Ихиняни тюкохона мэвами саваʼ тоˮолха. Тарця олимпиадахана нюртей мэваʼ пыхыдами хорпаӈгудмʼ. Школахана районнаˮ тиӈгывна ӈэвы пирдырмахана мэдамзь. Ненэй вадавна няби Ямалнаˮ невхы илеˮми тохоламбавахана сиˮми тэравыць. Салехарданʼ товани нерцюна вареми мэць хамекудамзь. Сян яӈорэйʼ теневабцуниˮ ихинани тензебтесетын. Ӈадьбята сейми нирка няркомбюˮ.
Новый Портхад товы Виолетта Вануйто тарця вади хэтась:
— Мань сидндетимдей классахана мэдмʼ. Тедаʼ нянаˮ нердеʼ пяванда манзаяваˮ вадеˮӈаць. Ненэй вадавна паднаӈгуваˮ. Пуна краеведениемʼ пяӈгуваˮ. Ханзерˮ падвахадани ехэраркадмʼ. Таремӈгавʼ сававна хамекудамзь. Ненэй вадаваˮ пэртя — Зоя Хосевна, пыда сиˮми тидхалембись, ненадо табекуда нин юрыбюˮ. Стихотворение падыба теневадмʼ. Ненэй няби луца вадавна ӈэсетыˮ. Пудана яляхананаˮ ӈопой падвэми вадетадмʼ.
Панаевскʼ хардахад юдимдей классахана мэна Сядай Евгений теневабцуда ӈадимдембаӈгу. Тохолкулваʼ мякнандоʼ сиддоʼ тохоламбада — Надежда Сэромовна. Пыда таремʼ ибедорˮӈа:
— Ӈацекынаˮ иландоʼ саирм, вадамдоʼ теневабтоʼ тара. Тарцяˮ пирдырми сертабавадоʼ сава. Хусувэй харвана теневабцуда манэˮта. Тохоламбадиниˮ ӈахакуд ятналтамбасетын. Небой поʼ не ӈацекэми нерняʼ хаˮмыць. Нита поӈгад ваˮлёяркаӈэ тэрадонзь.
Пэдаваˮ нинаˮ варемдоʼ мэˮӈаяˮ. Хибямдоʼ сямянхат иӈудотаӈэ тэравамдоʼ ӈани яляхана намдаӈгуваˮ. Няндоʼ сыраць ӈаниˮ нидоʼ пирдырмахана мэванʼ харваӈгуˮ.
Руфина Окотэттоʼ падвы
Сидяӈг: Руфина Окотэттоʼ тадтавы
Авторы
Няръяна Нгэрм
Темы