Няръяна Ӈэрм
Ӈацекы тохоламбада
Сяхаӈгав’ тодо’’ хардахат Саляӈгардахана ӈацекы тохоламбада’’ ма’’люрӈаць. Теневана’’ няхатато’ тохолкурӈаць. Теневабцодо’ ӈадимдембиць. Таняна Мария Яптикым’ торомдадамзь. Лаханакурмани’ сер’ иланда ваде’’ӈась. Пыда Ямальской районхад Пэ саля’ хардахад ӈа. Нисяхаюда-небяхаюда выӈгана илеӈаха’. Ӈацекы ӈэванда мальӈгэхэд хой’ няӈы илам’ сававна теневада. Тохоламбада ӈацекэхэта ханзер’’ ӈэрм’ тер’’ илам’ ваде’’мамда, манэ’’лабтамбавамда хонрамбидамзь.
— Мань Яптик’’ саля’ хой’ няна соядамзь. Ӈацекы ӈэвани’ мальӈгэхэд таняна иледамзь. Выӈгы иле’’мями ихинани тенев. Няханани поёрманзь, нерманзь, тудако, ӈоди ма’’ламбуванзь ханцетыдм’. Нюдяко ӈэдахани небями, хадами си’’ми хусувэй ӈамгэхэна тохоламбихинзь. Сэдора, халям’ хыраба теневадм’. Хадани пивад сэдадамзь. Ӈобкана сэдоранинзь, си’’ми тидхалембись. Тикы нюртей сэдъями тамна тенев. Мя’’ни тер’’ хусувэхэндо’ нид ӈодякоход паӈгалӈадамзь. Панормам’, ӈодяком’ пэрмам’ сямянхат харвобтав. Хардахана ханяӈэхэна панорцетыдм’. Хой’ ня’ небяхаюни’-нисяхаюни’ манэ’’манзь ханцетыдм’.
Си’’ив похонани’ хардан’ тохолкованзь тэвываць. Тиртя ӈанохона сидна’’ ханаць. Пэ саля’ интернатан’ тэвынаць. Таняна сэврини мэ’’ӈадамзь. Луца вадам’, ханзер’’ ембата таравам’ нивась хамедамбю’’. Паднабцям’ ня’’амбавам’, парта’ тяхана ӈамдё ехэрадамзь. Тохолкованзь товэӈэ ӈопой классахана мале сянваць. Ӈаркамбой’’ тохолкода’’ нина’’, луца’’ нена’’ сидна’’ табедамбасеты’’. Тикы’ сер’ харад’ иланд’ тухудамзь. Ӈани похона нябимдей классан’ то’’махадани’ нянани нензелась. Тарем’ школа-интернатхана хасава юдимдей класс’ ӈэсонд’ мэдамзь.
Манзаянда нямна
— Саляӈгардахана Ямальской многопрофильной колледжхана нюдяко ӈацекэхэ’’на манзара тохолкурӈадамзь. Хар’’ни ихини таня’ хэсь таславась. Тохолко вареми мэ’’ӈадамзь. Тарана’’ серка’’на ӈани’ мэсетыдм’. Пуна школахана манзара пэйваць. Таӈок по’’ сер’ теневабцуни тамна сававна ӈокамдаванзь, институтхана тохолкудамзь. Теда’ манзаями тяхасовна мэнев. Хусувэй по’ тидхалембада’’ серона’’ яӈгамдамбасетыдо’. Мань ихинани сава. Ӈамгэхэв ехэранам’ тохола тарасеты, тикы ӈани’ нюрцям’ ӈэсеты. Ӈацекы тохоламбава нянани нензел’’. Нюртей тохолко пэвы тохоламбидм’. Пыдо’ вадёдавандо’ ямбан’ мань ӈод’’ едэй ӈамгэхэ’’ тоходанадм’. Тюку по’ тетимдей классм’ малеӈгу’’. Тохоламбадини’’ мал’’ маркана иле’’. Выӈгы илам’ ехэрадо’. Няндо’ ты пэртя’’, ӈэрм’ тер’’ ханзер’’ илевам’ вадецетыдм’. Ханяӈэхэ’’на киноӈэ, сидяӈгаӈэ манэ’’лабтамбасетын’. Ӈацекыни’’ тэри’ пысаӈгасеты’’, хонравандадо’ ӈока ӈэсеты. Хуркари’’ мэкад’’ серк’’ ядэласетын’.
Ӈобаӈгуна школаханана’’ «Душа Ямала» нюбета этно-фестивальм’ ӈэванзь ваде’’ӈаць. Тарцям’ намда мань ӈацекэхэ’’ни мадамзь: «Ямал’ нямна стихотворениедамда’’ тохолаида’’. Ӈэрм’ тер’’ ембдяро сераӈгуда’’». Тикы ненадо фестиваль ӈарка яна’’ тер’’ тодо’’ тэнз’’ ненэцие’’ яля’ е’’эмня миӈась. Ӈацекыни’’ ненадумда’’ма’ падарм’, ӈудито’ терад ня’’маць. Тад нерня’ ӈани’ варева’’ мэтава’’.
Тарем’ падарка’’на ва’’лёй нява’’ манзаямда сававна минремда. Тамна’ тяха’ саць тарана таром’ ха’’аврамбамда.
Автор: Руфина Окотэтто’ падвы
Авторы
Няръяна Нгэрм
Темы