обновлено: 04:56, 30 сентября 2024
Няръяна Ӈэрм
Ӈацекыда - иланда саирˮ
Вэбаʼ ирыʼ 27 яля — нюдя ӈацекэхэˮна манзараниˮ яля. Россияʼ ӈардавна еˮэмнандоʼ сава вади мэˮӈаваˮ. Пыдоʼ сямянхат тарана сермʼ минреˮ, пилиˮ нерденаӈэ вадёдана ӈацекы яляʼ няюʼ тидхалембиˮ, табедамбидоʼ, тохоламбидоʼ, нядабидоʼ.
Ӈопой тарця ненадо сермʼ минрена — Салиндер Светлана Вадимовна. Тандаярка «Няръяна Ӈэрм» газетаваˮ толабада ненэциеˮ еˮэмня иланда, манзаянда нямна лаханась.
— Сян поʼ ямбанʼ нюдя ӈацекэхэˮна манзаран?
— Салехардахана ӈэда колледжмʼ 2002 похона ёльцеˮмахадани мале сидя юкад вата поʼ ямбанʼ манзарадмʼ. Таняна нюдя ӈацекы тохоламбадаӈэ няхарˮ по тохолкурӈадамзь. Тикыʼ пуд Ӈыд хардахана интернатхана манзара пэйваць. Нюртей похоˮна тохоламбавы, тидхалембавы ӈацекыниˮ мале ӈарка ненэцяˮ. Тедаʼ «Чебурашка» нюбета садикхана манзарадмʼ. Ӈокханда тет мэваʼ няхарˮ потна ӈацекэци школанʼ хэвандоʼ ёльцяндʼ тохоламбинась. Сямянхат нюртейӈэ нянани мэвыˮ тадриʼ школахана тохолковамдоʼ ёльцеӈгуˮ.
— Ӈыд хардаханандаˮ ты пэртиˮ, нядэнаˮ ненэциеˮ ню школанʼ хэвандоʼ нерцюна тохоламбасетыдаˮ?
— Пыдоʼ еˮэмняндоʼ 2015 похона яӈга программамʼ пададамзь. «Группа выходного дня» нюбеˮӈа. Харданʼ хаˮмортаˮ ты пэртяˮ ӈацекыдоʼ тэврамбасетыˮ. Сиˮив яляхана ӈопой яӈорэй турцетыˮ. Нисянатоʼ, небянатоʼ хардахана мэваʼ мальӈгана ныланаваʼ яляхана сидтоʼ тохоламбасетываˮ. Тамна ӈопой группаваˮ таня — «Малышок». Мюсертаˮ ненэциеˮ мякана манзара. Сямянхат нерденаӈэ ӈацекы тохоламбадаӈэ тодо ӈэсыхыˮна Елена Худи, Виктория Яунгад, Елена Салиндер тараць. Ӈэсыʼ ӈацекы малˮ ӈобтʼ маˮлахая, паднабцие няˮамба, толырмʼ хамедамба тохоламбавыдоʼ, тарана теневабцудоʼ ӈокамдамбавыˮ. Таремʼ выʼ теркоцяˮ школанʼ хэвандоʼ мальӈгана хардахана илена няхататоʼ ниˮ хаюрˮ, пирувнандоʼ иӈудоӈаˮ.
— Ханярина тохолкодаˮ студентˮ теневабцудоʼ мэйрамба практикамдоʼ мэˮманзь садикхандаˮ турцетыˮ?
— Тарця манзаяваˮ ӈаниʼ танясеты. Мань тидхалембавэми — Ӈыд харданаˮ тер, Кристина Пандо. Нерняӈы илаӈгананда мэˮманда манзаямда Нядаӈгардахана Ямальской многопрофильной колледжхана тохоламбидась. Ӈадьбята практикамда тюкона мэць тасладась. Тохолковамда ёльцеˮмахаданда нянанаˮ манзарась. Ӈулиˮ пэдава илебей некоця.
— Ненэй манзаянд хавна тамна хуркариˮ серкаˮна тарасетын?
— Россия янаˮ, округнаˮ серо няˮамбади тэрабаванаˮ мальӈгана нядаӈгосетыдмʼ. Тэраӈговаʼ янаˮ толырˮ — 522-й. Нермбэртянаˮ марцьхэӈэ тарадмʼ. Мюсертаˮ нинаˮ мерʼ тэраӈгосетыˮ, ӈэсыхытоʼ тиртя ӈанохона тэворцетываˮ. Ненэцяˮ сяхаӈгартʼ пуняʼ нисетыˮ ӈаˮ. Таремʼ ӈэдалёроˮмини мальӈгана ӈахат интернатхана тохоламбавы ӈацекыни манэˮцетыдмʼ. Мале хартоʼ нюсавэйˮ. Невхы иринатоʼ иламʼ нёдаˮ, нюкцидоʼ вадабиˮ, тыдоʼ лэтамбиˮ, халямʼ хадабиˮ. Харни тохолко ниниˮ манэць ӈаниʼ маймбасетыдмʼ. Ихинани ӈулиˮ сава ӈэсеты, ӈарка яни еˮэмня тарана манзаямʼ минревани хавна, ӈока ниниˮ мякана мядондаʼ тоˮолхадмʼ ӈэсетыдмʼ. Сава иӈукана, илебядё харданʼ тэвсетыдмʼ.
Тикыʼ хавна мяни тер няць Саля явʼ вархана таӈы нумгана ненэй мяˮмаˮ мярсетываˮ.
Таʼ таняна илесетываˮ, ӈодядаваˮ маˮламбасетываˮ. Небями сэдорасеты. Ханяӈэхэна малˮ, не ниниˮ мядʼ тер няць ядембада ёˮ няʼ ӈэдалёрцетываˮ, ӈобкана ныланасетываˮ.
Не нюхуюниʼ Алиса няби Арина Ӈыдʼ школахана тохолкурӈахаʼ. Ӈанине не нями, Лилиана не мяӈгми ӈацекы тохоламбадаӈэ тараӈахаʼ. Тадриʼ школанаˮ 90 пода ӈэӈгу. Тикы ненадо ялянʼ хамекуˮ.
«Манзаями — харни ивнани тэравэми, тарода ӈарка. Илми тюкона ӈа, няданда передмʼ. Хусувэй яляʼ нёлёкоця ӈацекыˮ вабц намдорӈадмʼ. Пыдоʼ ими савумдамбиˮ. Ӈобкарт вэва иӈутоʼ яӈгу. Маняˮ ӈарка ненэцяӈэ нядандоʼ ӈобтикы хусувэй ялянʼ маймба тоходанаваˮ. Мань сидтоʼ харвабтадмʼ. Ӈадьбяни тюкона манзарадмʼ. Ханяӈэхэна саӈговопата ӈодˮ, минрена серми савуˮӈав, пирӈав», — таремʼ инда серʼ ӈэда манзаянда нямна Светлана Вадимовна лахана.
Г. Окотэттоʼ падвы
Сидяӈг: cheburashka-nyda.yanao.ru няд ханавы
