Няръяна Ӈэрм
Чедеш таԓа
Чуки 2025 пома Россия дяханана Год защитника Отечестваӈэ тунԓы. Ӈаԓка дяна паԓыӈота хайноԓьш нэхэԓмаӈ дет тонԓюта поӈэ тасԓаӈаташ. Маня’’ Ямалханана чуки пома «Год героев», округна ӈаԓка веԓв таньше тасԓамы. Таԓям пуӈ ӈайвахана манԓе таньдет ӈайта шеԓу’’ шанат каԓтыхина мээԓӈаш’’.
Чуки похона хампԓяӈк дёнаԓкат ва’’та мероприятии’’ шеԓтанаӈа’’. Таньнякуй дяԓяхана Каԓпюԓкана диԓина неша’’ ӈопт ӈомаш’’. «Снежный» нимита клубхана «Год защитника Отечества», «Год героев» найӈаш’’. Чики каԓтыхина диԓина’’ ӈаԓка концерт’’ шеԓтаӈаш’’. Таньдет ӈайта патриотический’’ кынсу’’ мэӈаш’’, таԓаӈаш’’, ванԓмана’’ шеԓтамайтуӈ театрализованный’’ пастановкам’’ ӈычимчеӈаш’’. Ӈашкиуди’’ ӈаԓка нетуӈ маныдешь выӈу’’шамна куԓкаԓи’’ кынсу’’ мэш кынуӈа’’, таԓаӈа’’.
Чики дяԓяхана четдяӈкня потуӈ каймы’’ ӈашки’’ неԓьчеэй паспорт’’туӈ няамӈа’’. Таԓьша мепроприятии’’ ӈаԓтана’’ ӈашкяхена’’ таԓаӈа’’. Шиниӈкуй ниԓинана, катанана хайноԓмам, четан СВОхана мэна нена’’ хайноԓман дюԓмана тай’’хана шеԓтамы’’.
Чуки похона наԓаӈ шитчет’’ дю’’ пуӈэ кайны хэлаку’’ ԓусахана’’ хайноԓьш нэхэԓма похот. Маня’’ ӈаԓка дяна чеԓ’’ нэхэԓмахат шанат ӈыди дяӈ чеԓ’’ таӈкаш диԓинԓайташ’’. Хайноԓьш нена’’ чокуԓюмам чедеш таԓа. Таԓям четаӈ Ямалхатна хайноԓьш каймы нена’’ куняна хайноԓмам, куше округханана хайму’’ нятапёмамтуӈ вачаштума’’. Таньдёԓьшкай шеԓу’’ ӈаԓтана’’ ӈашки’’ чедимямаӈ мэт, маня’’ Пуровский’’ районханана чуки похона куԓкаԓи’’ таньдет ӈайта мероприятии’’ шеԓтанаӈа’’.
Андрей Пяк патмы
Авторы
Няръяна Нгэрм
Темы