Няръяна Ӈэрм
Деты нятакома
Чуки похона Ямалханана Ӈэԓм’ чеԓ’’ нешади’’ дилм чуув падеԓьш шеԓтамы дорожная картам детымтанӈатуӈ. Чики хома шеԓ округна ӈаԓка веԓв таньше тасԓамы. Таӈичохона пыта Тазовский’ районхана выӈкна диԓина’’ нешади’’ мяту’’ няна канӈаш. Ӈамы выӈкай дилант таԓамам, нешаӈкна дилтуӈ нямна дëԓимяшош намтдяташ.
Тай’’ня чикиӈ пут маԓьшхайта’’, Ӈэԓм’ чеԓ’’ нешади’’ дил нямна ӈайта мансдям минԓена департаментхат мэна’’, таничуӈ дямпан нешади’’ мяту’’мана дятыԓяш’’. Выӈкна диԓина’’ нешади’’: тэхэ’’на мансԓани’’, каԓитани’’ выӈкай дилхантуӈ ӈамы таԓамаӈ нямна конԓымпиш’’. Таньше нешади’’ конԓампюма мансдям Ямальский район’ веԓв Андрей Кугаевский минԓеӈаташ’’. Четаӈ манԓе куки шеԓутоӈ тасԓайтоньш.
Чуки похона Ӈэԓм’ чеԓ’’ нешади’’ мичиԓпëта ты’’ ӈамши’’ веш’’ ӈоктандятуӈ. Первый’ категорин тонԓюта ты ӈамса ӈуп килограммта миԓ хампԓяӈк дюԓ’’ веша ӈайты, второй категории — шича дюԓ’’ хампԓяӈк дю’’. Манԓе тытуӈ кыԓаман ха’та неша’’, тытуӈ ӈамши’’ таӈок вешамана миштондятуӈ. Чикиӈ камна тытуӈ миман ха’та понтуӈ шеԓ убойный пунктан миштондятуӈ. Кыԓамайтуӈ тытуӈ копа’’, пена’’, шейку’’, мыт’’, шан ниш’тондятуӈ ԓусаха’’ мис, няӈтуӈ кыдиԓештондятуӈ. Таньде’эмня ӈайта вачитоӈ ӈупчики тасԓамытуӈ. Ӈай ӈыди деты шеԓтоӈ ты’’ паԓтону де’эмня ӈа.
Чуки похона нешади’’ няаммы ветеринарный’ аптечке’’ деты паԓтонхана’’ нятанайтуӈ. Куԓка паԓтон ты’’ деч’’ хомяхамтапëш таԓамам, ӈупчики тэхэна мансԓани’’ конԓахадяш тасԓайтоньш. Ӈопшеԓ ӈуп денаԓкат ва’та хампԓяӈк дюԓ’’ ты’’ падиԓта хозяйствам паԓтонхана нятанаӈа’’.
Чикиӈ камна детымтамытуӈ дорожный’ картан тохоԓкота’’ ӈашки’’ нятапëмаӈ дет ӈайта шеԓу’’ патнаӈа’’.
Андрей Пяк патмы
Авторы
Няръяна Нгэрм
Темы