Няръяна Ӈэрм
Деты похона деты шеԓ’’
Ԓусан патаԓмана деты пон каамдяна’’. Ямалхана чуки 2025 похона Ӈэԓм’ чеԓ’’ нешади’’ дет тонԓюта деты нятакома шеԓ’’ ӈычимтаӈа’’. Выӈкна, петаԓахана диԓина нешади’’ нятапëш шеԓтамайтуӈ ненэй мят дет ӈайта «Чумовой капитал» чуки похона ӈай тадяӈайты. Таԓьша ӈамыку’’ выӈкай дилхана таԓаӈа’’.
Тат неԓьняӈ деты похот чумовой капиталым нимимты нюта дяԓяманымы нешант ӈупчики мичиԓпёты’’. Округна ӈаԓка веԓв, выӈкна диԓина’’ нешади’’ мятумана дятэԓьш таньше тасԓаӈаташ. Ӈамы выӈкай дилант таԓамам, нешаӈкна дилтуӈ нямна дëԓимяшош намтдяташ. Чикиӈ камна выӈкна, петаԓахана диԓина’’ деваку’’ ӈашки’’ ӈупчики выӈкай дилант таԓана’’ ӈамыкохана’’ нятапётдятуӈ. Мятуӈ шеԓташататуӈ дедятатуӈ миштоны’’.
Чуки похот Пуровский’ районхана диԓина’’ нешаӈк, кимя таԓьшан ха’ӈа, пяй мятуӈ хынԓуԓшататуӈ металлочерепицам миштоны’’, ӈаԓка патми’’. Ӈыди ӈай деты шеԓтоӈ ты’’ паԓтону де’эмня ӈа. Чуки похона нешади’’ нямаԓпёта ветеринарный’ аптечке’’ деты паԓтонхана’’ нятанайтуӈ. Куԓка паԓтон ты’’ деч’’ хомяхамтапёш таԓамам округханана ӈупчики тэхэна мансԓани’’ конԓахадяш тасԓайтоньш. Чикиӈ камна детымтамытуӈ дорожный’ картан тохоԓкота’’ ӈашки’’ нятапëмаӈ дет ӈайта шеԓу’’ патӈаш’’. Деты похот выӈкна, петаԓахана диԓина’’ нешади’’ ню’’, мансдяӈ дет тохоԓкота’’, ӈупчики нятапётдятуӈ. Мансдяӈ дет очно тохоԓкота’’ ӈашки’’, неԓьчеэй тохоԓкош каймянтуӈ дёԓьшкана шитчет’дю’’ дёнаԓ вешам няамнаӈа’’. Таньше округма мансдян тохоԓкота’’ Ӈэԓм’ чеԓ’’ ӈашки’’ нятанайта. Таԓьша веша’’ выӈкат, петаԓахат мэна’’, мятуӈчеԓ’’ ӈука ӈайта, нешанатуӈ, немянатуӈ чадю вешам мансԓаш нямаԓпёта’’ ӈашки’’ дет тасԓамы’’.
Чики няаммайтуӈ вешаханатоӈ тохоԓковштуӈ дяхатуӈ кяш мээвтамтуӈ кантуӈ миԓ тэмтанаӈа’’, таньняна диԓишатуӈ мятуӈ миԓ, панытатуӈ, тохоԓкош мэсутатуӈ ӈамыкотуӈ тэмтанаӈа’’. Чикиӈ камна четыдяӈ мансдяӈ дет тохоԓкош хитамы ӈашки’’, бюджетный’ организацихи’’ мансԓаш чепьпатоӈ, диԓишатуӈ мятуӈ тэмтамамтуӈ митчештондятуӈ. Ӈуп диԓихина мятуӈ миԓт шича дю’’ дёнаԓ вешам нямаԓпёты’’. Таньше нятапётдятуӈ. Чикиӈ камна мансдяӈ дет вузхана очно тохоԓкота’’ Ямалхат мэна’’ Ӈэԓм чеԓ’’ ӈашки’’ понтуӈ шеԓ хомана тохоԓкомантуӈ де’эмня округна ӈаԓка тэтаӈ таньдет тасԓамы стипендим нямаԓпëты’’. Чикитоӈ ӈуп диԓихина — дю’’ дёнаԓ веша’’.
Таӈ камна выӈкат мэна’’ ӈашки’’ дет тонԓюта образовательный’ сертификат’ тадя. Таԓьша вешаӈ патаԓ шеcв’дю’’ хампԓяӈк профессин тунԓы. Чикиӈ камна чуки похот выӈкна диԓимы’’ пеншим нямаԓпëта’’ ӈаԓка неша’’ каԓтан диԓинԓапнантуӈ «кочевые» вештуӈ ӈупчики нямаԓпётдятуӈ. Непуӈ пуӈ хусыкана таньше Ямална Законодательный Собраниӈ мыԓхана таньше тасԓаӈатоньш. Понантоӈ таԓьша ӈяштуш, вcйсыку’’, пуша’’ каԓтан кааммахататоӈ чики вештоӈ шан ништутоньш нямаԓпю’’. Деты нятакома шеԓ’’ округханана диԓина’’ нешади’’ дилм чуув падеԓьш шеԓтамы’’. Выӈкна, петаԓахана диԓина’’, мансԓанна’’ неша’’ мансдятуӈ шеэмӈа, дилтуӈ неньшаԓ ниӈа.
Таԓям таньше шичитуӈ нятама — хома шеԓ.
Андрей Пяк патмы
Авторы
Няръяна Нгэрм
Темы