Няръяна Ӈэрм
Деты шана’кум шеԓтаны’’
Нешади’’ шутпяԓсу’’, ванԓат’’ нямна ӈайты, дёԓьше вильты. Шанат тэмс нешади’’ культураӈ дет ӈайта центрхана мансԓанна’’ деты шана’кум шеԓтаны’’. Любовь Суздальцева, Виктория Айваседо ӈашки’’ шана’кот шеԓтаманьч мэты «Чумовая мафия» нимита проект’ патӈаханьш. Таԓьша вивӈут, ӈаԓтана’’ ӈашки’’ выӈкна диԓина’’ нешади’’ шутпяԓсу’’, ванԓат’’ чедимямаӈ мэт, пы’чи комэч’.
Чики проект’ Ямална ӈаԓка веԓв грант’ ня’амӈаш. Деты шана’кум шеԓтаманьч мэт ня’амваньчеч вешач’’ ӈуп миллион’ ӈок ӈайты’’. «Чумовая мафия» шана’ку ӈаԓтана ӈашки’’ дет тунԓы. Ненэй мя’кна шана’коштоны’’. Мафия нимита ԓуши’’ шана’котԓям шеԓтамы’’, няймы шана’кота’’ нимитоӈ нешади’’ шутпяԓсхат’’, ванԓхат’’ мэмы ним’’ ӈайты’’. Ненэй мя’кна шана’коштоны’’. Таԓьша мятоӈ ЦНКхана тадя.
Четаӈ, чуки ноптухуна каԓтыхина диԓина’’ ӈашки’’ телефонутуӈ ня’ампё дяԓямтоӈ маташтутуӈ. Деты шана’контуӈ ӈычимахат ӈопт ӈомштоны’’, няханатуӈ шана’коштоны’’. Нешаӈ ватамана мунуштоны’’, кынсу’’, шутпяԓсу’’ намташтоны’’. Навышудёԓ ЦНКахана мансԓанна’’ маньԓе проектхантуӈ таԓанаха’’ ӈамытатуӈ шеԓтапёнԓнаӈа’’. Мыԓичуӈ деты шана’комтуӈ мэ’эԓнаӈатуӈ. Школаха’’на тохоԓкота’’ ӈашки’’, мансдяӈ дет Таԓкахай колледжхана тохоԓкота’’ чики шана’кохона шана’коштоны’’. Шеcв дяԓяхана ӈуп мэмаӈ шана’комтоӈ мэштонӈатуӈ. Чет’ диԓиӈ дямпан таньше шана’коштоны’’.
Чики проект’ минԓеш ЦНКахана мансԓанне’’ Пюԓ дяхана ӈайта ассоциация «Ямал — потомкам!», нешай’’ ӈашки’’ дет тонԓюта молодежный’ советхана мэна’’ нятапётдятуӈ. Чумовая мафия шана’кохона ӈашки’’ шана’комам татташтонӈатуӈ, ЦНКаӈ соцсетьхана интернетмана ӈычимчештонӈатуӈ. Тай’’ня чики шана’комтоӈ ӈука’’ неша’’ манэштонӈатуӈ.
Автор: Андрей Пяк патмы
Авторы
Няръяна Нгэрм
Темы