Няръяна Ӈэрм
Дилма хомана минԓеӈама”
Чуки диԓиӈ кашем՚дючимты дяԓя — каԓьтуӈ дяханатуӈ диԓина» нешади» дет ӈайта дяԓя. Таԓьша хома дяԓя ӈаԓтана» ӈашки» де’эмня таԓаӈа», шиниӈкуй ниԓинатуӈ -катанатуӈ мэ’мы диԓивсум, ватам дюԓмантуӈ тайхана. Ямалханана шанат тэмс» неша» диԓе». Дискат дилмтуӈ выӈкна минԓешь диԓина» Ӈэԓм’ чеԓ» неша» — ненэй неша», тасам капи», вахандя капи».
Маня дяханана ӈысма» ӈупчики таньдет тунԓы, чуувна ты» падеԓьш, каԓиташ мансԓаӈа». Пюԓ дяханана мат’дёнаԓкат ӈука» Ӈэԓм’ чеԓ» неша» диԓе», шичадёнаԓ хампԓяӈкдюԓ ӈоктуӈ выӈкна диԓина», мюшаԓта» неша». Ӈэԓм’ дяханана тэмстуӈ чадю неша» шиниӈкуй ниԓинатуӈ — катанатуӈ диԓивсум нётаӈа», каԓьтуӈ ватамтуӈ мэӈа». Ӈукадёмутоӈ каԓиташ, ты» падеԓьш чуувна выӈкна мансԓаӈа». Выӈкай дилмтуӈ ԓэтԓымпи», деты дилант тасԓёта» шеԓу» хомана чедимяӈа». Ӈаԓтана» ӈашки» ӈамэхэԓт выӈкай ӈайватам ни’ дехеԓа»: ты» падеԓьш, каԓиташ мансԓашту, выӈкай дилант таԓана куԓкаԓи» ӈамыдю» меԓьмана шеԓташту». Ԓакхай по”хоты неша», капи», ӈысма», каԓьтуӈ дилмтуӈ хомана вивинтоԓкадя неԓьняӈ минԓеӈатуӈ. Каԓтыхина» диԓинетун шанат предприятихина», учрежденихина» мансԓаӈа». Хомана мансԓамантуӈ камна куԓкаԓи» мероприятии» шеԓташту», шанат мянаԓмахана — спортхана, конкурсхана», форумхана» мянаԓьш нэхэԓьшту».
Чикиӈ камна ӈаԓдя» ӈашки» хомана школамтуӈ хитаԓамахатоӈ шанат, вихинтуӈ камуԓта» мансдяӈ дет тохоԓко кӭшту». Четаӈ университетхана, колледжхана, техникумхана тохоԓкота» ӈашки» ӈука». Таӈ камна маня» Пюԓ дяхана Ӈэԓм’ чеԓ» нешади» дет тонԓюта управлении’ мансԓаӈа, Ямал-потомкам!» ними’та ассоциацима тадя. Дяна чеԓ» неша» каԓьтуӈ тасԓашь димутатуӈ ӈамыԓи шеԓтуӈ, вататуӈ тадяӈӭйпы, таньняӈ кӭшту». Таньняна мансԓанна» нетуӈ шичитуӈ няташту». Четаӈ тэмстуӈ чадю нешади» дет ӈайта дяԓяхана маня» дяханана диԓина» нешаӈк» маман хаӈама»: хома шоньшахана нета» няӈата», мансдяԓа нидя ше’эм, хомана диԓиӈата», нинюта канэԓ».
Лариса Айваседо патмы
Авторы
Няръяна Нгэрм
Темы