Няръяна Ӈэрм
Едэй лекар’’ мяканандо’ манзара’’
Ӈыд’ тер’’ едэй лекар’’ мято’ понарка ӈатедонзь. Теда’ таняд сава юнм’ намдава’’. Ӈавэдана едэй по’ нердена ирыхына лекарадо’ едэйвана мивы хардандо’ мюня манзара пявыд’’. Ненэця’’ хабцяӈодо’ савумдаванзь лимбя’ ирыхыд таня’ ядэрӈа’’.
Ӈахат сер’ хусувэй ӈамгэдо’ таня. Ӈопой, лекар’’ мэта’’ мутра’’ мал’ едэй’’. Хаӈгулавы ненэця’ вэям’ ханаӈгу’’, вэявнанда хабцяӈода таслаӈгу’’. Саӈговота хабцям’ манэць тараб’’нанда, тикырихина Нядаӈгарад’ лекараха’’ вэямда ӈэдабтаӈгудо’.
Поликлиника няби стационар ӈобкад переӈаха’. Теда’ саӈговоць хаӈгуртидо’ манэ’’манзь харад’ няби вэт’ ядэрць ни тараӈгу’’. Стационархана юседана’’ е’’эмня мале сян хонё лохом’ (палатам’) сертавы’’. Мюняндо’ мата ядо’, ваӈгдо’ таня’’. Хаӈгурта ненэць’ хабцяӈода савумдамба тэри таӈга юседаӈгу.
Рентген-кабинетханандо’ тивак’’ хабцяӈо ӈобтикы едэй’’ мутры няд’’мяць тасламбаӈгудо’. Ӈока по’’ ямбан’ таняна Людмила Алексеевна Ключникова (Чернокнижная) манзара. Харад’ тер’’, вы’ тер’’ мал’ тикы лекарамдо’ саву’’ӈадо’.
Ӈацекы’’ лекарадо’ — Татьяна Анатольевна Тарханова. Пыдхавада хусувэй ӈысы’ ӈацекым’ тенева, хусувэхэндо’ сава вадам’ хоӈгу. Сян мэва’ тиртя ӈанохона ты пэрти’’ мядо’’мана ӈэдалёрмакы. Сита нядабадаӈэ Нядонги Елена Коколевна тара. Ӈобкана няхар’’ юкад вата по’’ ямбан’ ӈацекы лекарабтамбихи’.
Физиотерапевтической кабинетхана мэна лекар’’ недо’ Ирина Сергеевна Окотэтто манзаямда ӈани’ тяхасовна минреда. Хаӈгурта’’ ненэця’’ тенева’’: сиддо’ ёльце сававна лекарабтаӈгу’’, мер’ сензӈэ ханда’’.
Таняна’’ лекар’’ хибяхартм’ няд’’маси’’ ни’’ хаеӈгу’’. Хардандо’ тер’’ е’’эмня варемдо’ мэ’’ӈа’’. Едэй яханандо’ манзаямдо’ тамна сававна тидхалембаӈгудо’
Автор: Галина Кинчина’ падвы
Авторы
Няръяна Нгэрм
Темы