Няръяна Ӈэрм
Едэй мутры мэˮлаˮ
Мале танякуй поʼ тынаˮ яӈгабавандоʼ мальӈгана тамна биркы хахатоʼ ӈабтамба пяць. Тыˮ лекарˮ мутры нядˮмяць хибяʼ тыʼ ӈэвамʼ, ӈамгэхэд яӈгабавамдоʼ, тамна ӈани тарана юне толаба мэˮэйдоʼ. Хабартаваʼ ёльцяӈгана биркы лаха хаˮаврамбидоʼ. Биркахад толавыдоʼ тамнаʼ тяхаʼ телефонмʼ нядˮмяць ӈэдарамбидоʼ. Ваˮлёрта ӈока.
Хахаяда яляʼ хабарталвахана ӈаниʼ ӈобˮ едэй мутрамʼ манэˮлабтаць. Тикамдоʼ хэвы сиˮив яляхана Приуральской районхы «Паюта» хабарталвахана хорпавэдонзь. Тарця сермʼ тыˮ лекарˮ серо минренаˮ манэˮлабтадонзь. Хабарманзь тэвравы тыˮ подʼ мюмня ӈэдарамбабатоʼ нярхалавы семпяд ямб пяʼ ӈыламна ӈэдабтамбаӈгудоʼ. Тиканда тюˮуд хуркари тамна нюдяко мутраˮ ӈыдыˮ. Ӈыламнанда подʼ мюмня сянри ӈок тыˮ ханаць пирӈадоʼ. Нярхалавы мутрасавэй пя харта толабаӈгуда, таслаӈгуда. Ӈопой, тыдоʼ малʼ биркасавэйˮ (чипсавэйˮ) ӈэбтоʼ сероˮӈаˮ.
Таремʼ хабарталвахана ненэцяˮ мерʼ манзара пиртадоʼ. Невхы потоʼ тотревʼ тыдоʼ ӈудахаˮна нидоʼ толабаӈгуˮ. Тедариʼ ӈани хабарталвахаˮна тарця мутра ӈадиˮмамʼ нидоʼ вадесˮ. Тикахана сава ӈэбта, ӈани яхаˮна масиˮ ӈобтикы ӈадимданакы.
Марина Яройʼ падвы
Авторы
Няръяна Нгэрм
Темы