Едейковам’ харвабтана

Салехардахана илена’’ ӈацекы’’ тохолковандо’ пуд cёбар’’, сёётэй’’, падтаӈгода’’, едэй мутры тохоламбада’’ школаханато’, тамна ӈани’’ яӈга таславы яхана ма’’люрцеты’’. Таняна теневабцудо’ ӈокамдамби’’. Тикыдо’ сяхари’ нерняӈы илаӈганандо’ маси’’ тарабцу’’. Ӈопой тарця не ӈацекы — Устинья Степула.

Нюдя ӈэванда мальӈгэхэд ёльце илека серм’ торомдамби. Салаба’ нимня коньки мэць едейкурӈа. Тикы ӈобтикы сёбар’’ ненэцие’’ сер’’, «фигурное катание» нюбе’’ӈа. Тохолковада Ледовый дворецхана ӈэсеты. Сита то’’олха нита ня помнандо’ пирдырмидо’ танясеты’’. Устинья минрена серта саву’’ӈада:

— Тохолковами ёльце’’махадани тренерӈэ тохолкованзь хандадм’. Манзаядани мэтав. Ӈадьбяни вареми мэ’’ӈадм’. Салаба’ ниня теци, тарем’ ӈод’’ тецьдам’ нива’’ пилюс’’, ханяӈэхэна тамна едейкурмани сер’ нисетыв хамеда’’.

— Мят тер’’ сит нядабасеты’’, табедамбасеты’’?

— Сямянхат сава нями — небями. Нюмда — Маргарита Вануйто. Пыда лекар’’ не. Нюдя ӈэвани мальӈгана ёльце нядаӈгосеты, тохолкось яхани си’’ми ханласеты. Пирдырманзь яӈганя’’ хардаха’’ ӈэдалёрпана’’, ӈани’ нянани мэсеты. Хусувэхэд е’’эмнани сава вадам’ хосеты. Етри’ си’’ми тидхалембасеты. Тюку та’ небяни ня’ Сочи марад’ няна ӈэдалёрӈанинзь. Тэри ныланаванзь нининзь ядэр’’. Таняна тохолковами миӈась. Теневабцуни’’ ӈули’’ мэйраян. Тикы’ пуд мякни тэвыни’.

— Выӈгана, ненэй мякана илена’’ нид’’ таня’’?

— Ирими иланда ямбан’ ты пэртяӈэ тарась. Хадами мядм’ пэртяӈэ манзаравы. Теда’ ӈобкана пенсияхана мэӈаха’, Яр-Саляхана илеӈаха’. Та’ харад’ хэвхы выӈгана ненэй мякана илесетыхы’. Небяни ня’ ӈобтикы нянанди’ мядонзетыни’. Маси’’ тад’’ тованда таӈы ныланавами’ ӈани’ хэвхананди’ мэтами’.Пудана’’ по’’ ямбан’ тохолковани е’’эмня таня’ нининзь тэвор’’. Салехардан’ хадаюни’, ириюни’ мядоманзь харти’ турцетыхы’. Лилия хадами е’’эмнани мяд’ пухуцям’ сертась. Етри’ нянани минарцетыв, неноховавна пирдырманзь ядэрпани ӈаворини’’ пад’ мюня ӈэсеты. Ихинани си’’ми нядабада то’’олха. Нисяни небя, Анастасия хадами — ӈани я’ тер. Нянани телефон’ мутравна лаханасеты. Табекуда ӈобтикы няд’’маӈэ мэцетын. Пудана мэва’ пирдырмани’ нерцюна нянанда лаханакурӈадамзь. Сёнзяни мюй ӈули’’ таӈгамда то’’олхась. Маси’’ тикы’ янхад нись тоса едейковакэдм’.

— Теда’ сёбар’’ нит поӈгана ненадумда’’мар хурка? Нерняӈы ялэд ханзер’’ тасламбид?

— Няхаромдей разрядм’ мэ’’ӈадм’. Тамна тяхасовна едэйкурпани нябимдей разрядм’ ня’’маӈгудм’. Ихинани теневабцуни савумдавани сер’ Россия’ тиӈгэвна пирдырман’ харвадм’. Нюртей разрядм’ мэти’’ поӈгана сидя по’ тяхана мэсь пиртав. Тикы’ е’’эмня салаба’ нимня едейко теневабцуни’’ тамна савумдамба тара’’. Ӈопой яхана нидм’ ӈамдёд’’.

Галина Окотэтто’ падвы

Сидяӈг: М. Вануйто’ тавы

Авторы

Няръяна Нгэрм

04:24, 08 января 2025

Темы