Няръяна Ӈэрм
Ӈэдяʼ выӈгана
Маня’’ ӈэрм’ ява’’ саць паской. Няби я’ панхана Ӈэдя’ тер’’ выӈгана хаерта сэв ӈодь сэван’ ӈадимя. Редакцияна’’ сава ня Данил Марюй вадам’ ӈэдарась.
Данил хахаяда яля’ харе’’ соя’’ма яханда тэворӈась. Пыда манэ’’мыда няна’’ ӈэдарэйдась. Ӈэдалёро’’мида тарем’ ваде’’ядась:
Нини’’ мядодо’ Ензя’ няна ӈа’’. Хальмер’ Седе’’э’ хардахад ӈэдалё мале хубта. Тев’ ёльцяӈгана саць теци. Вэнзер’’ ембдёховаб’’ пивня ядэрма’ то’’олха ни ӈа’’. Ненэй ненэцяӈгав’’ ёря мальцяха’’нато’, со’’окаха’’нато’ ӈамгэхэрт тецьда сиддо’ ни табламбю’’. Пихиня ӈамгэхэв манзаидо’ етри’ танясеты’’. Нито’ мядо’’мана’’ ӈэдалёрӈа’’, поёрӈа’’, ханяӈыдо’ тамна халяда’’. Таняна мэвани мальӈгана ялянда сэв я’ пан’ нимня ӈадибелыць. Тад нерня’ хусувэй яля’ хаерта тю’’у’ пэртада, тарем’ янамбовна ибаӈэ ханда.
Пыдара’’ ӈод’’ Ӈэдя’ выӈгана ханзер’’ илевамдо’ ӈани’ манэ’’ӈара’’. Тюку’’ сидяӈг’’ таняд тэвравы’’.
Марина Ярʼ падвы
Авторы
Няръяна Нгэрм
Темы