Няръяна Ӈэрм
Еˮэмнянаˮ минрена манзаидоʼ
Ӈэрмʼ терˮ серо няˮамбада департаментʼ ӈэвахана мэна Ульяна Каленюк минрена манзаяндоʼ нямна вадамда мэˮӈась. Интернетʼ мутравна «дорожная карта» нюбета падарʼ нямна лаханась. Неноховавна тикы ватоʼ серʼ тидхалембада серодоʼ вадеˮӈась.
Тюку поʼ ӈэрмʼ терˮ иламʼ савумдаваʼ няюʼ ненадо падартоʼ несэймдамбидонзь. Ӈокханда 33 нядаӈгосэйˮ матˮ ӈарка илаӈгананаˮ тарана серкана нядˮмаӈэ тараˮ. Тикыˮ: ты пэрмамʼ, халямʼ хадабавамʼ нерняʼ тидхалембава, тохолкова, ненэцие сенз ӈэвамʼ лэтрамбава, иле мядˮ, ненэциеˮ манзарась яˮ танява, иле янаˮ ӈэвахы серо нерняʼ минрева.
Тедаʼ невхы иринатоʼ иламʼ нёданаˮ ненэцяӈгат 5200 мядʼ терˮ нядˮмадамдоʼ няˮмарпиˮ. Нядаӈгосэйдоʼ тюку похона ӈаниʼ хаця несэймыˮ.
— Евакоӈэ хаёвыˮ ӈацекы ненэцяˮ выӈгана иле таславы ӈэбтоʼ, хусувэй илаӈгана тарана ӈамгэридамдоʼ няˮмаӈгуˮ. Мядʼ ӈуˮ, сырэйˮ, таӈыˮ еяˮ, хор (кор), латаˮ хавна есясавэй падартамдоʼ мипиˮ. Тикы есяханатоʼ тэдамдоʼ тэмда пирӈаˮ.
– Пуровской районʼ няна иленаˮ нядэнаˮ ненэцяӈгˮ пяˮ хардадоʼ мимба мэˮманда еся тебдамдоʼ мипиˮ. Хардандоʼ махалэй синдˮмяд, хордамдоʼ ӈаниʼ яӈга нядˮмаӈэ хомбиˮ.
«Чумовой капитал» нюбетамʼ 2021 поход 396 мядʼ терˮ няˮамвэдонзь. Тюку поʼ тамна 69 илебейˮ мядʼ терˮ тарцямʼ няˮамвыˮ. Мирта матˮ юрˮ есяхад ваˮӈа.
Тохолкодаˮ ӈацекыˮ еˮэмня 75 сертификатмʼ ӈадимдевыˮ. Тикыдоʼ колледжхана тохолко мэˮэйдоʼ. Нисянадоʼ, небянадоʼ мюсертаˮ нябиˮ иландоʼ няюʼ мэта есяндоʼ тянё ӈэбˮ, яӈга 4500 рубльʼ пирˮ стипендиямʼ мэˮӈаˮ. Ӈарка маркана институтхана нюртей поʼ тохолкодаˮ 21 студент сидндет юˮ ёнарˮ есямʼ няˮмаць. 193 сававна тохолкодаˮ Ямалнаˮ ервʼ ватовна ӈадимдевы юˮ ёнарˮ есямʼ терта стипендиямʼ няˮмарпиˮ.
Янаˮ тиӈгывна 42 матˮ-сиˮив потнаˮ ӈацекыˮ еˮэмня школа-интернатхаˮна яӈга тохолковамʼ минреˮ. Лимбяʼ ирыхыд тыˮ ниць ирыʼ ёльцяндʼ сиддоʼ нюртей классанʼ хэвандоʼ нерцюна тохоламбиˮ. Таремʼ Белоярскʼ, Гыдаʼ, Антипаютаʼ, Мыс Каменныйʼ няна манзараˮ.
2026 похона мюсертаˮ нинаˮ нядаӈгосэйдоʼ хаця ӈокамдаˮ. Лимбяʼ ирыʼ нюртей яляхад ӈэрмʼ терˮ электростанцияʼ есяʼ мирӈэ няхарˮ юˮ ёнарˮ есямʼ няˮмаӈгуˮ, ГСМʼ есяʼ мирӈэ — похона ӈопой яӈорэйʼ юкад вата сидя ёнармʼ мэтаˮ. Ӈаноʼ мюня мэˮманда «спасательной жилет»мʼ тэмда няхарˮ ёнармʼ няˮмаӈгуˮ.
Автор: Галина Окотэттоʼ падвы
Авторы
Няръяна Нгэрм
Темы