Няръяна Ӈэрм
Ея мяд’ капитал’ терм’ несэймдавэдо’
Мале сян по ямбан’ мюсерта’’ илебей’’ мяд’ тер’’ няд’’маӈэ ея мяд’ капиталм ня’’марпи’’. Тарця нядаӈгосэйдо’ Ямална’’ ӈардавна Ӈэрм’ яна’’ нермбэртя’ ватовна 2021 похона ӈадимдевы. Тюку ялэ’’ пиркана ӈока ненэця’’ тикым’ няд’’мяць мюсерць харто’ мядодо’ мэ’’ӈа’’. Ӈокхандо’ толаб’’, тет юркад вата мяд’ тер’’ ненэй мятамдо’ ня’’мавы’’.
Теда’ округна’’ ӈэвахана мэна’’ ерв’’ закон’ вато’ сер’ ненэцие’’ е’’эмня ӈадимдембада няд’’ма хурка ӈэвам’ несэйвана таславэдо’, хаця яӈгамдавэдо’. Тад нерня’ Ямал’ тер’’ ня’’муванда «чумовой капитал»ндо’ мюня ӈэда’’ ӈавори’’ ханярина илебто’ ӈод’’ ӈоб’’ толас’’ ӈэӈгу’’. Тикы табеком’ округна’’ нермбэртя пидте’’мяхананда мале мэйравэдась.
Тарем’ яӈгамдавы «чумовой капитал»‘ тер’’ тарця’’: 35 мяд’ ӈу’’, сидя 30 ты’’ хобахат сэдвы сырэй ея, сидя таӈы парасин ея, хор (кор), ӈопой кубометр’ пир’’ мяд’ лата’’, ӈобкарт еся тебсипой’’ мивы сидя хан. Яна’’ ӈардавна нюсавэй’’ илебей’’ мюсерта’’ ненэцяӈг’’ тюку иры’ 22 яляхад несэймдавы няд’’ми мипа пяӈгу’’.
Тандая’ Пэ’’ хоё’’ няна мюсертахат тет мяд’ тер’’ «чумовой капитал» нюбета няд’’мадамдо’ ня’’амвыць. Тысия еркарм’ мэтаха’’ Севастьян няби Екатерина тикы’ хавна тамна «Жилищный капитал молодой семьи» нядаӈгосэйм’ е’’эймэхэ’. Хэвы похона сие ниць ирыхына нябимдей нюди’ соявы. Ня’’амвы падроти’ сер’ нюти’ илесь хардад Аксаркахана тэмдаван’ харваӈаха’.
Есявна манэць ея’ мяд’ капитал’ миртя — самляӈг юр’’ ёнар’’ пир’’. Ӈэрм’ тер’’ е’’эмня округна’’ есь’’ пэнёсяӈгад ӈадимдембидо’. Терданда ӈу’’, ея’’, хор’’, хан’’ тара’’. Ня’’марпадидо’ — ӈэрм яна’’ мел’ ненэця’’ сэдыбада’’, мимбада’’. Пыдо’ нянандо’ тарця сер’’ манзаядандо’ тара. Ӈадьбята несэймдавы ватом’ ӈани’ теневабто’ тара. Таняна падвы’’ табеко’’ сер’ сэдораӈгу’’, хано мимбаӈгу’’.
Автор: Галина Окотэтто’ падвы
Авторы
Няръяна Нгэрм
Темы