Няръяна Ӈэрм
Ембдяро, мысыдо манэ’’лабтэйдо’
Сидя сян иры Мерне Хыльчивна Вануйто сэдораваримда мэ’’ӈась. Пыда таславы серт’ ӈахакуд хамекусь. «Ямалица» фестивалян’ ӈанэкурма’ таӈгм’ нянда нись тамбю’’. Ӈамгэ пиркана ненэця’’ я’ ханярид Салехард март’ ембдяр’’ мысыдо’ манэ’’лабтабада фестиваль е’’эмня ӈобт’ ма’’лыць. Поӈгнандо’ маня’’ сава нява’’ ӈани’ мэсь.
Маӈгты’’ иры’ еркана сидя яля’ ямбан’ «Ямалица» фестиваль миӈась. Тикадо’ мел’’ ненэцие’’ сертабада манзаи’ нерня’ минрева’, ӈани’’ ненэцяӈг’ манэ’’лабтамбава’ няю’ таславы. Ӈудикода’’ хуркари’’ яхат тэвыдаць. Ӈокханда мат’’ юд мян ва’’лёй’’ пирдырманзь ма’’лёвыць. Сэдорана’’ харто’ сэдвыдо’ ненэцяӈг’ няхар’’ явна манэ’’лабтамбидунзь. Нерденядо’ ¬¬- ӈэрм’ тер’’ ненэцие’ ӈоб’’ мэта’’ ебдяро’ сыдоро’ табэдамбиць. Няби — мел’’мана сэдорана’’ едэй илаӈгана, хардахана мэта имбытадо’ сыртаха’’ ӈадимдембиць. Няхаромдэйдо’ — концертха’’на тарана’ ненэцие’’ ед’ сэдвыдо’ ма’’лёвы няхато’ манэ’’лабтамбиць. Хусувэндо’ сэдвы сэвхана ӈули’’ хамзъялысь. Сэдорани’ поӈгад ханяӈэндо’ няхатата тикы яля’ пирувна ва’’лёйха’ ха’’амвам’ жюри’’ тасламбидонзь.
Сэдорани’ хавна фестивалян’ ӈарка яна’’ юнета модельер’’ тэворӈаць. Харто’ сэдвы’’ ембдиродо’ ненэцяӈг’’ ӈани ваць манэ’’лабтамбидунзь. Мурманск’ маркад — Виктория Истомина, Красноярск маркад — Анна Григорьева, Ростов яхад — Евгения Красичкова тэворӈаць. Маня’’ сёетэй нина’’ сидя яля’ ямбан’ мядондито’ е’’эмня сёдо’ хайнаць.
Фестиваль яляхана ӈоб’’ сава сидяӈг’ выставкам’ манэ’’ӈаваць. Тадма’’ ненэй ненэцие’’ тюӈгатова’ нямна ӈэда’’ серо’’ манэ’’лабтамби. Нерденя яляханана’’ Галина Харючи няби Денис Князев ханзер’’ манзаянди’ ӈадиво’’мам’ няна’’ серокута’ сер’’ ваде’’ӈадинзь. Сидяӈгади’’ ӈопой ӈарка проект’ пеля’ ӈэдараха’’. Денис Князев вадавна, я’ тиӈгывна пыда нита’ ня’’ тодо’’ тэнзм’ мэта’’ ненэцие’’ тюӈгутава нямна лахарё’’ минре’’. Ти, Галина Павловна нянда’ ня сидяӈгаха’’на ненэй ненэцие’’ тюӈгутавам’ ваде’’ӈаха.
Автор: Марина Яр’ падвы
Авторы
Няръяна Нгэрм
Темы