Няръяна Ӈэрм
Ӈэпту” паӈкаԓпиш”
Куԓкаԓи» мэкат ӈэпт». Шанат тэмс нешади» дет тонԓюта центрхана мансԓанна» конкурс’ «Ямальская коса» шеԓтаӈаш». Ӈэпт паӈкаԓпёш чет’ ни» мянаԓяш». Кимяӈ ӈэпт хома ӈаймям жюри» тасԓайтоньш. Куше ӈэпт паӈкаԓмам мянаԓта» чупей» чедимяӈа».
Шиниӈкуна неша ни» ӈэпту» мэштомай». Таԓьша ӈэптатоӈ каԓьтуӈ паӈкаԓьштомай». Ӈӭвтуӈ таԓт шаԓаштомытуӈ. Ӈэптӈэ мяляку» мым пеԓь нодяй» видякохо» ӈопт паӈкаԓьштомай». Майшаԓтатоӈ ӈочаку», катахаԓамы», нюча кыннанауди» — шеӈкауди», дюснауди» шеԓтайтомай». Таԓьша майшаԓкана» паӈкаԓмы ӈэпт, кадяԓю нум дяԓяхана, тытԓи туляне дялкапчёштомай. Куԓка тэмс нойхана», шамян, шаӈок ӈочакохона» шеԓтамамта, неӈи каԓьта тасԓанӈата. Таньше ӈэптхана» шаԓта ӈайвантаԓ куԓкаԓи» ӈайватам мэтан ни’ шепан. Неӈи хайтуԓанаханта, дятнаханта, пай’танаханта таԓьша ӈэпт махамта неньшамтампюты. Четаӈ таԓьша ӈэпту» деняԓ ниш’ту» мэс», куки неӈи» праздникԓихина» таԓьштоӈ ӈӭвтуӈ таԓк паӈкаԓьштутуӈ. Таԓям четаӈ ӈаԓтана ӈашки» шиниӈкуй нешай диԓе мэмы» ӈамыку» чедимямаӈ мэт, таԓьша конкурсу» шеԓташту». Ӈэпт паӈкаԓпё мянаԓта» тотуӈ мэкат ӈэпту» паӈкаԓмай». Чики конкурсхана ӈайвахай местам’ Самбуԓкахат мэна Марта Петровна Няруй канаӈаташ. Пы’та паӈкаԓмайта ӈэпта номинацихина «Сохранение традиций» пиԓи хомаӈэ жюри» тонԓаӈаш». Номинацихина «Самая звонкая коса» Каԓясамэхэт мэна Надежда Казымкина нэхэԓяш, пиԓи кыннанаӈэ пы’та ӈэпта тонԓаӈаш». Пиԓи мэкат ӈэпт Мария Кунина паӈкаԓяш, пы’та номинацихина «Самая яркая коса» нэхэԓяш. Таисья Музыкантова номинацихина «Самая длинная коса» ӈайван ка”амдяш, пы’та паӈкаԓмайта нята» шеԓтамы» ӈэптхат» пиԓи дямпаш. Конкурстуӈ хитамахат мянаԓмы» ни» тотуӈ диплому», веш дет ӈайта сертификату» ня”амӈаш».
Андрей Пяк патмы
Таттама: Андрей Пяк таттамы
Авторы
Няръяна Нгэрм
Темы