Няръяна Ӈэрм
Ӈэрёй хасёдаˮ
Ханяхавана, ӈэрмʼ яʼ някуна мале сыраӈэ хаясь. Идеда салабаӈэ хаерˮ нумгана ӈыхы янʼ ябереˮ. Тыʼ хораˮ ӈахана селваць. Нямдодоʼ пыв мерця мале сэрӈэ сертэйдась. Ненэцяӈгана тарця нув мянувнанда ӈаниʼ ёльце сава. Хаерта яля тюˮуна ӈа, саць ни тецюˮ.
Сидяӈгахаˮна маниенаˮ ненэциедаˮ — Тасуʼ явʼ терˮ. Пыдоʼ невхы иринатоʼ илаʼ саирмʼ нёдаˮ. Тедаʼ сывʼ мэлвахатоʼ нись паромба мюсеˮ. Мюдхана мэта тытоʼ хэваˮ саваˮ, ӈадьбята ӈодˮ пуйхана мэнаˮ таӈга нявотыˮ. Ихиня тарця ӈэбата сава ӈыˮнивˮ. Сельбяʼ няна ханзохона ӈамзидоʼ таӈга мимбидонзь. Сыранда торарка ӈэсь тыˮ хадырпатоʼ, хадохонандоʼ минхаˮ няданʼ тэворӈаˮ.
Минбатоʼ ненэцяˮ тэри ниˮ ӈамдюˮ. Хусувэй яляʼ ӈамгэхэв едэй ӈавэ сертабиˮ. Ӈэсындоʼ ерв вэсако ханамда харумдамби. Тикада хасава манзаяхата тяхамась. Нарэй пявэда ӈэрёй сыраханда тэвыˮ. Сяхаринда тарця ни ӈэсетуˮ. Тедаʼ сидяʼ яляʼ серʼ едэй ханамда нултаӈгуда. Ямдабˮнандоʼ тандаяʼ мивы ӈэдалёсьмʼ мэˮлаӈгу. Няхарˮ сэрˮ хабтхана, едэй ханхана мюдʼ ӈэвахана тэри няваталаӈгода. Хан мимбавари вуни ӈаˮ, тикыта хавна тамна ӈэсындоʼ ядхы тохона ватаӈгода. Тандаяʼ ватавы халя ӈаниʼ ӈавыдоˮӈа.
Тедаʼ ненэцяˮ мядʼ ядхана ӈэда тоʼ няюʼ янамбовна ядаˮ. Тикахав ӈаниʼ едэй мэкад лахарёˮ.
Марина Ярʼ падвы
Авторы
Няръяна Нгэрм
Темы