Няръяна Ӈэрм
Ӈэрёй нувона’’ то’’
Тандая’ я’ ний ӈарханда тодо ӈолепяха’’на падтавы’ то’’олхась. Ненэця’’ ӈодядамдо’ ма’’ламба варемдо’ мэ’’ӈаць. Ханяӈы’’ тэри нылаванзь пэдари’’ някумна ядэрӈаць. Вэба’ иры’ ямбан’ тарем’ илеваць. Тарем’ ӈод’’ ӈэрёй нувона’’ янамбовна сидна’’ тэва’’.
Ханяӈэхэна я’ нийм’ синё тондасетыда. Я’’авлада мерця сарёсавэй’’ ладсетыда. Хо’’, нерка’’, паё’’, хусувэй’’ я’ ний’’ пякоця’’ вэбасипой сибёрахаӈэ хаяць. Нув’ сармик’’ иба я’ няю’ мюсенархаць. Выӈгана, пэдарахана илена ненэця’’ пудандо’ тёресеты’’: «Мер’, мерэй, мереӈадов’’! Сибиляӈгэй мар’ хобов нердандов лехэбтаей’! Яйдавов, пукдавов!»
Нядаӈгарад’ тер’’ вадёдана нюдо’ тохоламба ӈобтикы невхы иламдо’ тензебтембавы’’. Хор’’ иры’ самлянзимдей яля’ ӈарка хардандо’ хэвхы пэдаран’ ядэрмы’’. Ӈацекэхэто’ выӈгы илма’’ ваде’’мы’’. Тэри помнандо’ иландо’ нямна лаханакурмы’’. Мюсерта’’ нидо’ тензебтембавы’’.
Тарем’ ненэцие ӈобт’ нясламбадаӈэ «Ямал — нюна’’ я!» Ассоциация’ тер’’ тара’’. Сидто’ нядаба Культура’ мякад сёётэй нидо’ турмы’’.
Г. Окотэтто’ падвы
Авторы
Няръяна Нгэрм
Темы